Йæ сæйраг экспонаттæ сты бæхтæ
Сабидуджы уарзон хъазæн. Дзæуджыхъæуы æнтыстджынæй кусы, æмбал кæмæн нæй, ахæм хæдзарон музей. Йæ сæйраг экспонаттæ сты бæхтæ. Кавказы иунæг чи у, уыцы музей æрбынат кодта Сергей Голомзикы хи хæдзары. Авторæн музей у, зæрдæйæ кæуыл кусы, æмæ адæммæ историон æвдисæнтæ кæй фæрцы хæццæ кæны, ахæм фæрæз. Йе рхъуыдыдзинæдтимæ йын базонгæ не сфæлдыстадон къорд дæр. Бæлвырддæр радзурдзæн Касаты Наирæ.
Сергей Голомзик йæхæдæг арæхдæр равзары нæзы бæлас, стæм хатт тæрс æмæ гæды бæлæстæ. Музейтæн дзы аразы алыхуызон хъазæн бæхтæ. Зæгъæм, 18-æм æнусы индиаг бæх, автор ма йæм бахаста йæхи уæлæмхасæн хицæндзинæдтæ. Æппæт экспонаттæ сты историйæ ист æмæ историйæн.
Ацы хи, кæнæ та хæдзарон музей фæзынди 2017-æм азы. Фæлæ йæ бындуры цы коллекци уыди, уый Сергейы бинойнаг Иринæ æмбырд кæнын райдыдта 10 азы размæ. Абон дзы ис мин æмæ 5 сæдæ экспонаты бæрц. Уый дунейы 60 бæстæйæ хъазæн бæхтæ. Фæлæ дзы сæйрагдæр бынат ахсынц Советон Цæдисы æмæ Уæрæсейы территорийы кæй арæзтой, уыдон.
Музейы историон зал дзурæг у, рагзамантæй фæстæмæ адæймагæн æмæ бæхæн æнгом бастдзинад кæй ис, ууыл. Автортæ равдыстмæ бахастой бирæ цымыдисаг æууæлтæ, спайда кодтой зындгонд историкты амынддзинæдтæй дæр. Экскурсийы фенæн ис Ходы Никъалайы скульптурæ «Садоны згъæрдур ласæг» дæр. Æнæнхъæлæджы йæ ссардтой Дзæуджыхъæуы заводтæй иуы пъадвалы. Æмæ æрмæст уый нæ.
Историон залæй фæстмæ музейы ис тематикон зал дæр. Хъæздыг у æлыгæй, фарфорæй, хъуымацæй, пластикæй, авгæй, хъæдæй æмæ æфсæйнагæй хъазæнтæй. Нывæфтыдтытимæ музыкалон аттракционтæ, æхситгæнæнтæ, статуэткæтæ, æфсæйнаг æхцатæ æмæ маркæтæ. Æппæт ацы мидисджын дзаумæтты æвæрд ис ацы куыст зæрдæйæ чи уарзы, ахæм адæмы фæллой.
Зæгъын хъæуы уый, æмæ музейы æрмадзы дæр бирæ дзаумæттæ саразынц, Сергей Голомзик сног кæны къæдзæхтыл цы нывæфтыдтæ вæййы, уыдон. Æвдыст дзы цæуы археологон æркъæхтыты рæстæг кæй ссарынц, ахæм историон æвдисæнтæ дæр.
Алы экспонаты дæр дзы æмбæхст ис историйыл дзурæг хæзнадон. Ацы музей Кавказы у иунæг, гæнæн ис æмæ Уæрæсейы дæр. Æрбацæуджытæ хъуамæ рагагъоммæ сæхи ныффыссой, уымæн æмæ ис авторы хæдзары. Ам цымыдисаг уыдзæн куыд хистæртæн, афтæ сывæллæттæн дæр. Сабитæн дзы гæнæн ис се сфæлдыстадон арæхстдзинад бафæлварынæн дæр, уый фæстæ та сын равдисдзысты бæхты тыххæй киноныв. Æртæ азы размæ музей хаст æрцыди Уæрæсейы хи музейты ассоциацимæ. Ис сæм хи эмблемæ – уый сын у паддзахадон историон музейы лæвар.
