Бирæуæладзыгон хæдзæртты кæртыты ныр дæр ма ис ахæм бæлæстæ
Дзæуджыхъæуы æрæджы цы тыхджын дымгæ уыд, уый аххосæй горæты алы районты акалдысты 10 бæласы онг. Арæхдæр æрдзон фыдбылызтæ фæуæлахиз вæййынц æмбыд æмæ зæронд бæлæстыл. Бирæуæладзыгон хæдзæртты кæртыты ныр дæр ма ис ахæм бæлæстæ. Æмæ фарста куы сæвзæра, уæд куыд лыг кæнгæ у æмæ курдиатимæ кæдæм бацæуын хъæуы, уый тыххæй радзурдзæн Тъехты Элинæ.
Гæмæонты Людмилæ хæдзары хъæппæрисджын къордимæ афæдзы размæ горæты администрацимæ балæвæрда курдиат, цæмæй бар райсой бæлæстæ акалынмæ, уый тыххæй. Сæ кæрты цы гæдыбæлас ис, уый сын сæ зæрдæты тас рагæй уадзы. Уымæн æмæ бахус æмæ кæд æрхаудзæн, уый бæрæг нæй. Дымгæты рæстæг йæ къалиутæ бирæ хæттыты æрхаудысты фæндагмæ. Людмилæ куыд зæгъы, афтæмæй бæласы рæзты ацæуын æдас нæу.
Аварион уавæры цы бæлæстæ сты, уыдон афойнадыл куы нæ акалай, уæд сæ бон расайын у знаггадмæ. Къостайы проспекты 258-æм хæдзары цæрджытæн сæ курдиат сæххæст кодтой. Ис дзы цалдæр æмбыд бæласы. Уыдонæй иу тынг хæстæг у сывæллæтты фæзмæ. Специалисттæ сæ калынц, стæй лыг кæнынц, йæ къалиутæ кæмæн хъыгдарынц, уыцы бæлæстæ дæр.
Бæлæстæ акалыны бар хъуамæ радта горæты администраци. Адæмы курдиаты фæстæ бынат сбæрæг кæнынц специалисттæ æмæ æркæсынц, бæлас æцæгæйдæр аварион уавæры ис, æви нæ. Экспертты хатдзæгты фæстæ, цъæхфæлысты æмæ хæрзарæзтдзинады управленийы минæвæрттæ раттынц бар. Фаронимæ абаргæйæ, бæлæстæ акалыны тыххæй ацы аз курдиæттæ фылдæр сты. Дзæуджыхъæуы цъæхфæлысты æмæ хæрзарæзтдзинады управленийы сæйраг специалист Хекъилаты Мæхæмæт куыд зæгъы, афтæмæй фыццаджыдæр кæсынц æппæтæй зæронддæр бæлæстæм.
Закъонмæ гæсгæ, адæймагæн бæлæстæ лыг кæныны бар йæ къухы куы бафта, уæд сæ йæхи бон у акалын. Уыцы хъæппæрис адæймагмæ куы разына, уæд ын хъуамæ цъæхфæлысты æмæ хæрзарæстдзинады управленийы специалисттæ бакæсой инструкци æмæ радзурой æдасдзинады техникæйы тыххæй.
