Йæ проектмæ гæсгæ дзы иу сахатмæ ауадзæн уыдзæн 200 бæлццоны
Дзæуджыхъæуы аэропорты дарддæр цæуы ног терминалы арæзтад. Йæ проектмæ гæсгæ дзы иу сахатмæ ауадзæн уыдзæн 200 бæлццоны. Ныр та уал аэропорт зынтæй аххæссы уыйбæрц адæмыл. Ацы аз аэропорты лæггæдтæй спайда кодтой 700 мин адæймаджы. Кæцы къæпхæны сты комплексы цалцæггæнæн куыстытæ, уый тыххæй бæстондæр радзурдзæн Сосранты Жаннæ.
Афæдзы размæ дæр ма ацы бынаты ницы уыд. Фыццаг æнцойгæнæнтæ дзы фæзындысты апрелы. Уæдæй фæстæмæ дзы аразджытæ скодтой дыууæ уæладзыджы. Сæ куыстыты цыд сын схонæн ис тагъд. Аэропорт «Дзæуджыхъæу» раивдзысты æндæр структурæмæ. Хæдтæхджыты чысыл æрлæууæн бынатæй хаст æрцæудзæн астæуккагмæ. Рæстæджы домæнтæм гæсгæ йæ хъæуы фæуæрæхдæр кæнын.
Объекты фæллой кæны 150 адæймаджы. Боныхъæды уавæртæ аразджыты нæ хъыгдарынц, уымæ гæсгæ сæ зæрдæ дарынц, афойнадыл кæй сцæттæ уыдзæн объект, ууыл.
Специалистты канд бæстыхай саразын нæ хъæуы, фæлæ ма хъуамæ барæвдз кæной, бæлццæттæ хæдтæхæгæй аэропоты бæстыхаймæ кæуылты бацæуынц, уыцы гæнæн – телетрап. Фæнд ма кæнынц аэропорты алфамбылай саив кæнын. Æппæт уыцы куыстытæ хъуамæ конд æрцæуой сæрдмæ.
