03 марта 2022, 14:11
Дзæуджыхъæуы аивæдты колледжы концертон залы арæзт æрцыд моноспектаклы премьерæ
Йæ сæвæрыныл бакуыста Хъоцлаты Сослан
«Майя». Ахæм сæргондимæ Дзæуджыхъæуы Гергиты Валерийы номыл аивæдты колледжы концертон залы арæзт æрцыд моноспектаклы премьерæ. Йæ сæвæрыныл бакуыста Хъоцлаты Сослан. Афтæмæй сценæйы фæзынд, зындгонд балет «Кармен-сюита»-йы æмæ легендарон балеринæ Майя Плисецкаяйы хъысмæт æвдисæг цымыдисаг истори. Сæйраг ролы – Цæгат Ирыстоны адæмон артисткæ Анжелика Тер-Давидянц. Аивæдты колледжы адæмон инструментты оркестрæн разамынд лæвæрдта Абойты Хетæг. Уый ацагъта зындгонд балетæн фыст музыкæ. «Кармен-сюита» фыст æрцыд 1967-æм азы. Уыимæ сæрмагондæй Майя Плисецкæяйæн. Ныффыстой йæ кубæйаг хореограф Альберто Алонсо æмæ композитор Родион Щедрин.