Фембæлдмæ æрбахуыдтой Цæгат Кавказы республикæты, Хуссар Ирыстоны ветеранты организациты минæвæртты æмæ Уæрæсейы хуссар хайы хъазахъхъæгты
«Дунейы сабырдзинады сæраппонд». Ахæм сæргондимæ Дзæуджыхъæуы арæзт æрцыд «Абхазаг бархионты цæдисы» конференци. Фембæлдмæ æрбахуыдтой Цæгат Кавказы республикæты, Хуссар Ирыстоны ветеранты организациты минæвæртты æмæ Уæрæсейы хуссар хайы хъазахъхъæгты. Мадзал гом кæнгæйæ, йæ архайджытæ минут æдзæмæй алæугæйæ æрымысыдысты, 92-93-æм азты Абхазы æмæ Гуырдзыйы хсæн хæстон цауты архайгæйæ йæ цард чи радта, уыдоны рухс нæмттæ. Фæстæдæр ныхас цыд актуалон фарстатыл. Фыццаджыдæр стыр æргом аздæхтой рæзгæ фæлтæримæ куыстмæ. Ам хъæуы иудзинадыл, хæлардзинадыл æмæ кæрæдзийæн æххуыс кæныны фарстатыл кусын. Æрмæст афтæмæй ис адæмты хсæн хæлар ахастдзинæдтæ парахат кæнын. Конференцийы ма æмхъæлæсæй сфидар кодтой Абхазы президент Аслан БжАниямæ сидæн. Баст у хæсты ветеранты тыххæй закъон сфидар кæнынимæ. Уымæй дарддæр ма арæзт æрцыд координацион совет. Бацыдысты йæм æппæт организациты минæвæрттæ. Ахæм фембæлдтытæ арæзт цæудзысты рæстæгæй-рæстæгмæ.
