Фестиваль байгом уыдзæн 13-æм июлы уынгты театрты, йæ архайджыты æмæ Дзæуджыхъæуы уазджыты карнавалы цыдæй
Дзæуджыхъæуы арæзт æрцыд, Æппæтуæрæсеон театралон фестиваль «Вахтангов. Путь домой»-ы агъоммæ пресс-конференци. Архайдтой дзы вице-премьер Платы Альбинæ, Евгений Вахтанговы номыл театры директор Кирилл Крок, фестивалы директор Алексей Никитин, Уæрæсейы Адæмон артист Евгений Князев æмæ æндæр бæрнон кусджытæ. Фестиваль байгом уыдзæн 13-æм июлы уынгты театрты, йæ архайджыты æмæ Дзæуджыхъæуы уазджыты карнавалы цыдæй. Рацæудзысты Сæрибары фæзæй æмæ ацæудзысты Сабырдзинады проспектыл Уырыссаг театры онг æмæ фæстæмæ. Кирилл Крок куыд загъта, афтæмæй Театралон фестивалы спектакльтæм билетты сæйраг хай æлхæд æрцыдысты 2 куъыримæ. Уæй кæнын та сæ райдыдтой февралы. Стыр кæронбæттæн концерт уыдзæн Сæрибары фæзы 19-æм июлы, æмæ цæудзæн 6 сахаты æмæ рдæг. Пресс-конференцийы ма фехъусын кодтой ног премийы тыххæй. Лæвæрд цæудзæн Цæгат Ирыстоны культурæмæ, социалон æмæ креативон индустрияты къабазмæ æвæрæны тыххæй. Уый аккаг уыдзысты, йæ райгуырæн регионæн æгæрон лæггад чи кæны, ахæм æрыгон адæм. Лауреаттæн фиддзысты 100 мин сомы.
