Республикæйы сæргълæууæг куыд бафиппайдта, афтæмæй хъуамæ сывæллæттæ исой хæрзхъæд зонындзинæдтæ хорз уавæрты, уыимæ уæлдай нæу, хъæуы æви горæты цæры, уый
Ахуырады системæйы райрæзт у республикæйы социалон-экономикон политикæйы фыццаградон къабæзтæй иу, рæзгæ фæлтæрыл аудын та æппæты хуыздæр инвестици – ахæм хъуыды загъта Сергей Меняйло, ахуыргæнджыты æрвылазон педагогон советы рæстæг. Республикæйы сæргълæууæг куыд бафиппайдта, афтæмæй хъуамæ сывæллæттæ исой хæрзхъæд зонындзинæдтæ хорз уавæрты, уыимæ уæлдай нæу, хъæуы æви горæты цæры, уый. Цæгат Ирыстон райдыдта архайын проект «ПроШколайы». Йæ фæрцы скъолаты равæрдзысты нырыккон ифтонгарз. Уымæй уæлдай бадæтдзысты курдиæттæ ног скъолатæ саразынмæ. Сергей Меняйло куыд загъта, афтæмæй ацы аз сæйрагдæр æнцой кæндзысты скъолаты материалон-техникон бындур фæхуыздæр кæныныл, ног ахуыргæнæндæттæ аразыныл, курдиатджын сывæллæттимæ куыстыл стæй ахуырадон лæггæдты æмвæзад фæуæлдæр кæныныл. Афæдзы кæронмæ хъæуы рацаразын хæрæндæттæ, саразын иумæйаг меню æмæ æдзухдæр цæст дарын сывæллæтты хойраджы уавæрмæ. Йæ раныхасы куыд бафиппайдта, афтæмæй пандемияйы уавæрты ахуыргæнджытæ равдыстой бæрнондзинад, профессионалон дæсныдзинад æмæ уды фидардзинад. Бузныг сын загъта сæ ахастдзинады тыххæй вакцинацийы фарстатæм. Профилон министр Алыбегты Эллæ куыд фехъусын кодта, афтæмæй ахуырады министрад æмгуыстады бадзырд бафыста Сочийы ахуырадон центр Сириусимæ. Уый фæрцы нæ респбликæйы ацæудзæнис скъоладзауты æппæтуæрæсеон олимпиадæйы къæпхæн 6 предметæй. Уымæй уæлдай нæ регион æппæты фыццаг йæхи бафæлвардзæн педагонон дæсныдзинады центры проект «Математическая вертикалы». Йæ фæрцы 7-9 кълæсты математикæ ахуыр кæндзысты инновацион методикæмæ гæсгæ. Нæ республикæйы 16 скъолайы та байгом уыдзысты кадетты кълæстæ.
