Нæ республикæмæ ссыдысты проектон офисы минæвæрттæ
Национ проект «Демографи» Цæгат Кавказы федералон зылды æххæст кæнгæйæ, Дзæуджыхъæуы арæзт æрцыд, федералон программæ «Хистæр фæлтæр» царды уадзыны фæдыл æмбырд. Нæ республикæмæ ссыдысты проектон офисы минæвæрттæ. Арæзт æрцыд Пироговы номыл институты. Уымæй дарддæр ма æмбырды архайдтой Цæгат Кавказы федералон зылды субъектты регионалон специалисттæ æнæниздзинадхъахъхъæнынады æмæ социалон куысты къабазæй. Бæстон æрлæууыдысты проекты фыццаг азы куыстыл. Бæлвырддæр та ныхас цыд 2019-æм азы нысанмæ арæзт бæрæггæнæнтыл. Специалистты хъуыдымæ гæсгæ, нæ регионы ис хорз хатдзæгтæ скæнæн. Уæдæ æрдзырдтой ныртæккæйы уавæрыл дæр, ома пандемийæ цы ивддзинæдтæ бахаста, ууыл.
Фембæлды ма ныхас цыд цалдæр ахсджиаг фарстайыл. Зæгъæм: хистæр кары адæмæн вакцинаци кæнын. Дæнцæгæн æрхастой иннæ регионты фæлтæрддзинад. Цæгат Ирыстон, проект æххæст кæныны хъуыддаджы равдыста хорз бæрæггæнæнтæ, фæлæ ма бакусинаг хъуыддæгтæ дæр ис. Афтæ нæ республикæйы нысан кæнынц хистæр кары адæмæн медицинон лæггæдтæ кæныны центр саразын. Уымæй дарддæр районты медицинон куыстуæтты та байгом кæндзысты профилон кабинеттæ, æмæ сæ сифтонг кæндзысты æппæт хъæугæ кусæнгæрзтæй. Æнæниздзинадхъахъхъæнынады министр Годжысаты Тамерлан куыд радзырдта, афтæмæй проект «Хистæр фæлтæр» æххæст кæныны сæйраг нысан у – хистæр кары адæмы цард фæдæргъвæтиндæр кæнын, æмæ сын лæггæдты хæрзхъæддзинад фæхуыздæр кæнын.
