Уый кадæн бацæттæ кодтой равдыст, Свердловскы сывæллæтты филармонийы мюзиклы театры артисттæ та адæмы размæ рахаста музыкалон номыртæ
Дзæуджыхъæуы арæзт æрцыд фестиваль «Урал-Кавказ. Связующие нити». Уый кадæн бацæттæ кодтой равдыст, Свердловскы сывæллæтты филармонийы мюзиклы театры артисттæ та адæмы размæ рахаста музыкалон номыртæ. Уазджытæ зарыдысты, æрмæст уырыссаг нæ, фæлæ ирон æвзагыл дæр. Ахæм мадзæлттæ æххуыс кæнынц нæ бæстæйы алы регионты хæзнатимæ хæстæгдæр зонгæ кæныны хъуыддаджы. Бæлвырддæр радзурдзæн Хъайтмазты Дзерассæ.
Ирыстоны æмæ Уралы адæмты хсæн рагæй ис æнгом бастдзинад. Фестиваль дæр афтæ уымæн хуыйны «Урал-Кавказ. Связующие нити». Цæуы ныр 7-æм хатт. Екатеринбурджы æмæ Ирыстоны цæрджыты зонгæ кæны кæрæдзийы культурæтимæ. Ацы хатт æрвылазон мадзал баст уыд, бындур ын цы организацитæ æвæрдтой, уыдоны юбилеимæ – центр «Со-действие»-йы æмæ Свердловскы Галаты Асланджерийы номыл ирон культурæйы æхсæнады. Уый кадæн арæзт æрцыд равдыст «Нам 20 лет!». Экспозицийы – Уралы регионы æмæ 2 æхсæнады архайды тыххæй æрмæджытæ.
Фарон фестивалы Ирыстоны цæрджыты базонгæ кодтой адæмон инструментты квартет «12 струн»-имæ, ацы хатт та мадзалы уазджыты размæ се сфæлдыстад рахастой Свердловскы сывæллæтты филармонийы мюзиклы театры артисттæ. Сæ концерт схуыдтой программæйы фыццаг композицимæ гæсгæ – «Город влюбленных людей».
Екатеринбургæй артисттæ азарыдысты æрмæст уырыссаг нæ, фæлæ ирон æвзагыл дæр – киноныв «Фатима»-йæ «Ибрагимы зарæг» æмæ «Мæ Ирыстон». Фестиваль «Урал-Кавказ» вæййы Ирыстоны дæр, æмæ Екатеринбурджы дæр.
Ацы изæр бæрæг кодтой æрмæст организациты нæ, фæлæ сæ разамонæг Гæбæраты Андрейы юбилей дæр. Сæххæст ыл 70 азы. Гæбæраты Андрей у Уралы 12 музейон проекты аразæг. Йæ бинойнаг Гаглойты Лианæимæ ахадгæйæ кусынц адæмты æнгомдзинадыл. Фестивалы сæ фарсмæ æрбалæууыдысты сæ хæлæрттæ – республикæйы культурæйы архайджытæ æмæ Парламенты минæвæрттæ.
Фестиваль «Урал-Кавказ. Связующие нити» ныридæгæн бирæ адæмæн баххуыс кодта Уæрæсейы алы регионты хæзнатимæ базонгæ уæвын. Æмæ ацы хъуыддаг дарддæр æххæстгонд цæудзæн.
