Зымæгон сезоны улахиздзау сси командæ «Окей, Гугл»
Дзæуджыхъæуы арæзт æрцыд интеллектуалон хъазт «Квиз, плиз»-ы финалон къæпхæн. Зымæгон сезоны улахиздзау сси командæ «Окей, Гугл». Уæвгæ, ацы фæсивæд интеллектуалон хъазты хуыздæртæ фыццаг хатт нæ систы. Ерысты сæхи фæлварынц нæ республикæйы сæдæгай цæрджытæ, сты алы карты æмæ дæсныйæдты минæвæрттæ. Къуыри цалдæр хатты сæмбырд вæййынц иумæ, æмæ сæ арæхстдзинад февзарынц кæрæдзийы хсæн. Фæрстытæ вæййынц алывæрсыг, райдай нырыккон музыкæ æмæ кинойæ æмæ фæу истори æмæ географийæ. Ерысты архайджыты размæ вæрд ис хæс, цыбыр æмгъуыдмæ раст дзуæппытæ радтын. Иу сезон ахæссы æртæ мæйы. Уыцы рæстæгмæ командæтæ сæмбырд кæнынц рейтинг, æмæ сæ хуыздæртæ рацæуынц финалмæ. Уый фæстæ та райдайы ног сезон. Ацы хъазт афæдзæй-афæдзмæ кæны парахатдæр. Ирыстоны та фæзынди 3 азы размæ.
