Фæлхасадмæ цæстдарды республикон Управленийы, Уæрæсейы гвардийы æмæ пъæлицæйы кусджытæ бæрæг кодтой дуканитæ, базарадон центртæ, кафетæ, спортивон залтæ æмæ гипермаркеттæ
Дзæуджыхъæуы арæзт æрцыд радон рейд базарадон объекттыл. Фæлхасадмæ цæстдарды республикон Управленийы, Уæрæсейы гвардийы æмæ пъæлицæйы кусджытæ бæрæг кодтой дуканитæ, базарадон центртæ, кафетæ, спортивон залтæ æмæ гипермаркеттæ. Стыр æргом аздæхтой санитарон домæнтæм. Бæлвырддæр та – объектты тæвдбарæнтæ æмæ дезинфекцион фæрæзтæ ис, æви нæ, уымæ. Уымæй дарддæр кастысты – адæм социалон дистанци куыд æххæст кæнынц, æмæ сæм qr-кодтæ ис, æви нæ, уымæ дæр. Бæрнон кусджытæ фиппаинæгтæ ницæмæ æрхастой. Бæлвырддæр хабæрттæ радзурдзæн Гæджиты Сослан.
Æхсæнадон хæрæндæтты фæлхасадмæ цæстдарды управленийы специалисттæ рейдтæ арæх фæаразынц. Ахæм бæрæггæнæн куыстмæ кафеты æмæ ресторанты хицæуттæ бæрнон цæстæй кæсынц. Æппæт домæнтæ æххæст кæнынц, куыд æмбæлы, афтæ.
Ацы фитнес-центры дизенфекцион фæрæзтæ, бахилæтæ æмæ маскæтæ æппынæдзухдæр вæййынц. Уæдæ дзы æфснайгæ дæр афоныл фæкæнынц. Фæлæ зындзинæдтæ æвзæрын кæны иу хъуыддаг, арæх се спортивон цæттæдзинадыл бафтауынмæ адæм æрбацæуынц æнæ qr-кодтæй, æмæ сæ уæд залмæ нæ бауадзынц.
Фæлхасадмæ цæстдарды управленийы специалисттæ Уæрæсейы гвардийы æмæ пъæлицæйы кусджытимæ сбæрæг кодтой егъау базарадон центртæ дæр. Иу объектмæ дæр фиппаинæгтæ не рхастой.
Мониторинг цæуы æхсæнадон транспорты дæр. Фæндæгтыл æдасæй цæуыны паддзахадон инспектортæ сбæрæг кодтой, автобусты санитарон домæнтæ куыд æххæст кæнынц, уый.
Специалисттæ зæгъынц, адæм систы хуыздæр зондахастыл хæст. Зын эпидемиологон уавæр уыцы хъуыддагмæ бахаста йе вæрæн. Адæм сæ зæрдæ дарынц, санитарон домæнтæ æххæст кæнгæйæ, коронавирусыл кæй фæуæлахиз уыдзыстæм, ууыл.
