Цæгат Кавказы федералон зылды уыдзæн фыццаг
Сывæллæтты туризмы æмæ экскурситы республикон центры аразынц, йе *нæниздзинад хъыгдард кæмæн у, уыцы сывæллæттæн иннæты æмрæнхъ сæ бон архайын кæм уыдзæн, ахæм скалодром. Цæгат Кавказы федералон зылды уыдзæн фыццаг. Сывæллæтты ахуыр кæндзысты, æмбæлгæ цæттæдзинад чи райста, ахæм педагогтæ. Центры куыстытæ цæуынц национ проект «Фæсивæд æмæ сывæллæттæ»-м гæсгæ. Бæлвырддæр радзурдзæн Хъайтмазты Дзерассæ.
Ирд, бирæвæрсыг æмæ сæйрагдæр та æдас. Цæмæй скалодром ахæм уа, уый тыххæй специалисттæ пайда кодтой æрмæст фидар æрмæджытæй. Куыстытæ райдыдтой 2 азы размæ, зындæр хай ныридæгæн æххæстгонд у.
Скалодромы архайыны фадат уыдзæн йе нæниздзинад хъыгдард кæмæн у, уыцы сывæллæттæн дæр. Цæгат Кавказы федералон зылды уыдзæн фыццаг ахæм объект.
Ныртæккæ центры ахуыр кæны, йе нæниздзинад хъыгдард кæмæн у, ахæм 42 сывæллоны. Куыддæр бырæн уæлцъарыл куыстытæ фæуой, афтæ специалисттæ бавналдзысты вентиляцион æмæ климат-бæлвырдæргæнæн системæ æвæрынмæ. Йæ фæрцы афæдзы цыфæнды афон дæр тренировкæ кæнынæн уыдзæн зæрдæмæдзæугæ уавæртæ. Ам фæзындзæн нырыккон инвентарь дæр. Дзуапп дæтдзæн хæрзхъæддзинады стандарттæн æмæ æвзонг спортсменты бахъахъхъæндзæн цæфтæй.
Афтæмæй спортивон объект суыдзæн цымыдисаг тыгъдад, йæхи бавзарын кæй фæнды, уыдонæн.
Куыстытæ æххæстгонд цæуынц нацпроект «Фæсивæд æмæ сывæллæттæ»-м гæсгæ. Скалодром байгом кæнын фæнд кæнынц хæстæгдæр фидæны.
