Куыстытæн се 70 проценты æххæстгонд æрцыдысты
Дзæуджыхъæуы ацы аз сцалцæг кæндзысты 43 уынджы. 23 федералон, 20 та республикон программæтæм гæсгæ. Куыстытæн се 70 проценты æххæстгонд æрцыдысты. Кæмæ базилдзысты, уыдонæй иу у Марковы уынг. Ныртæккæ дзы цæуынц цалцæггæнæн куыстытæ. Бæлвырддæр хабæрттæ радзурдзæн Хъайтмазты Дзерассæ.
Марковы уынджы фæндаг цалцæг кæныны куыстытæ сæ тæмæны сты. Кировæй Чкаловы уынджы онг хайы къæпхæнгай ивынц бордюртæ æмæ фистæгцæуджыты зонæ. Ацы хъуыддагмæ бынæттон цæрджытæ рагæй æнхъæлмæ кастысты. Цæттæ сты рæстæгмæ зындзинæдтæн бабыхсынмæ.
Фæндаггон фонды фехъусын кодтой, сæрмагонд æрхизæнтæ кæй уыдзæн. Фæнд ма кæнынц, Чапаевы уынджы онг баивын асфальт. Инфраструктурæ саив кæныныл æрæджы дзырдтой аппаратон æмбырды дæр, æрмæст бындурон цалцæгыл нæ, фæлæ дзыхъхъытæ æхгæныны куыстытыл дæр. Майы къæвдатæ кæй уыдис, уымæ гæсгæ куыстытæ афæстиат сты. Премьер Дзанайты Барис бабар кодта рæвдздæр бацархайын, цæмæй адæм ма тыхсой. Дзæуджыхъæуы администрацийы сæргълæууæг Милдзыхты Вячеслав зæрдæ бавæрдта, уый тыххæй куыстытæ æхсæвы дæр кæй æххæст кæндзысты, уымæй. Ахæм схемæмæ гæсгæ архайдтой Московскийы уынджы.
Цалцæггæнæн куыстытæ кæм цæуынц, уыцы бынæттæ чысыл не сты, уымæ гæсгæ шофыртæн фæндæгтыл цæуын æнцон нæ вæййы, фæлæ сæ фылдæр ацы уавæр æмбарынц.
Фæззæгмæ фæндæгты уавæр хорз уыдзæн, зæрдæ æвæрынц профилон фонды. Марковы уынджы куыстытæ фæуыдзысты июль-августы. Æххæстгонд цæуынц нацпроект «Æдас æмæ хæрзхъæд фæндæгтæ»-м гæсгæ. Æхцайы фæрæзтимæ, кусджытимæ æмæ техникæимæ къуылымпыдзинæдтæ нæй. Специалисттæ радзырдтой, æрмæст сæ иу хъуыддаг кæй тыхсын кæны – хæдзæрттæм æмæ организацитæм цы коммуникацитæ цæуынц, уыдон домæнтæм гæсгæ æвæрд не сты. Хъуамæ уой 60 сантимеры зæххы бын, хъуыддагыл та – сты 20 сантиметры. Уый аххосæй фæндаджы уæлцъар цы уæззау техникæ исы, уый цалдæр хатты бахъыгдæрдта доны хæтæлтæ.
Æдæппæтæй Дзæуджыхъæуы сцалцæг кæндзысты 43 уынджы. Уыдонæй 23 федералон, 20 та республикон программæтæм гæсгæ. Горæты администрацийы куыд загътой, афтæмæй ныридæгæн куыстытæн сæ 70 проценты æххæстгонд сты.
