Фестиваль райдыдта ирд æмæ цымыдисаг шоуæй
Дзæуджыхъæуы байгом 2-аг æппæтуæрæсеон фестиваль «Вахтангов. Путь домой». Фестиваль райдыдта ирд æмæ цымыдисаг шоуæй. Дзæуджыхъæуы сæйраг фæзы æмæ уынгты, Хетæгкаты Къостайы номыл фæлладуадзæн парчы æмæ Вахтанговы хæдзары æрæмбырд сты Уæрæсейы уынгты театрты сфæлдыстадон къордтæ æмæ аивадуарзджытæ. Фестивалы географи ацы аз аххæссыд фылдæр горæттыл. Ацы аз Ирыстонмæ ссыдысты Бурятийы, Рязаны, Татарстаны, Мæскуыйы, Санкт-Петербурджы æмæ æндæр горæтты минæвæрттæ. Уынгты театрты программæ дæр ацы аз у уæрæхдæр. Ноджыдæр парахатдæр у фестивалы ахуырадон программæ дæр. Лектортæ дзурдзысты театрты æмæ журналистикæйы тыххæй. Бæлвырддæр та – театрты тыххæй æрмæджытыл æмæ æрмæст уый нæ. Ивгъуыд аз фестиваль бабæрæг кодта 17 мин адæймагæй фылдæр. Ацы хатт дæр ахæм фадат ис 13-æм июлы онг. Уыцы бон, фестиваль фæуыдзæн уынгты театрты, цæгатирыстойнаг æмæ уæрæсейаг артистты æмæ зарæггæнджыты концертæй.
