Коллективæн раарфæ кæнынмæ æрбацыд республикæйы Сæргълæууæг Сергей Меняйло
Дзæуджыхъæуы байгом кодтой паддзахадон ансамбль «Алан»-ы ног цалцæггонд бæстыхай. Коллективæн раарфæ кæнынмæ æрбацыд республикæйы Сæргълæууæг Сергей Меняйло. 2023-æм азы ансамблыл æххæст кæны 85 азы. Уыцы мгъуыдмæ легендарон коллектив æнтыстджынæй парахат кæны ирон аивад дунейы алы бæстæты. Амæй фæстæмæ та ма артисттæн фæзындысты иттæг хорз уавæртæ репетицитæ кæнынæн. Фидараты Маринæ радзурдзæн бæстондæр.
Адæмты хæлардзинады ордены номхæссæг паддазахдон академион ансамбль «Алан» нымад у Цæгат Ирыстоны культурон хæзнатæй иуыл. Коллективæн ис хъæздыг истори. Кафджытæ сæ курдиат лæвар кодтой дунейы алы бæстæты хуыздæр сценæты. Аланы, йæ равзæрдæй фæстæмæ аивтой цалдæр фæлтæры артисттæ. Фæлæ æнæивгæ баззад иу хъуыддаг – сфæлдыстадон коллективы бæстыхай. Бындурон цалцæгмæ дзы æнхъæлмæ кастысты 20 азы онг.
Паддзахадон ансамблы цалцæг райдыдта ацы аз апрелы. Мидæгæй скодтой бындурон цалцæггæнæн куыстытæ: къултæ ныххафтой, баивтой бæстыхайы сæр, сног кодтой сантехникæ æмæ хъармгæнæн системæ. Ныртæккæ репетицион залты сæвæрдтой вентиляцийы нырыккон системæ. Куыстыты хæрзхъæддзинад фенынмæ æрбацыд республикæйы Сæргълæууæг Сергей Меняйло. Загъта йæ хъуыдытæ, ансамблæн ирон адæмы хсæн цы ахадындзинад ис, уый тыххæй.
Бæстыхайы бындурон цалцæгæй дарддæр ма артисттæ райстой ног автобус, гастрольтæм цæуынмæ. Районты чи цæры, уыцы кафджытæн та хорз фадæттæ сарæзтой æмдзæрæны. Æхсызгон лæварæн ма коллектив райста ног сценикон костюмтæ.
Ныртæккæ ансамблы артисттæн арæзт æрцыдысты æппæт æмбæлгæ уавæртæ репетицитæ кæнынæн. Ног залы та кафджытæ архайдзысты ног фæлгонцтæ æмæ ног номертæ аразыныл, цæмæй сæ репертуар хъæздыгдæр кæна, уый тыххæй.
