Сырх Дзуары организаци цы программæ рауагъта царды, уый
Улæфæнтæн сæрмагонд гимнастикæ, скандинаваг цыд, дзæбæхгæнæн физкультурæ… Уый у, Сырх Дзуары организаци цы программæ рауагъта царды, уый. Дзæбæхгæнæн-физкультурон центры бындурыл байгом, ковидæй рынчын чи уыди, уыцы адæмæн низы фæстиуджытимæ тох кæныны скъола. Бæлвырддæр – Касаты Наирæ.
Цæгат Ирыстоны медицинон академийы чи ахуыр кæны, уыцы волонтертæн-медиктæн фæстаг инструкцитæ, æмæ сæ бон у куыстмæ рахизын. Сатурацийы æмвæзад æмæ туджы æлхъывдад, рæуджыты куыст. Ацы бæрæггæнæнтæ ахсджиаг вæййынц. Специалисттæ сты сæ куысты уæлхъус. Уый та ууыл дзурæг у, æмæ райдайæн ис.
Ковидæй рынчын чи уыди, уыдоны улæфæнтæн сæрмагонд гимнастикæ у ахадгæ, зæгъынц дохтыртæ.Дзæбæхгæнæн-физкультурон центры кусæг Цъæритты Зæлинæ коронавирусæй рынчын уыди зымæджы. Йæхæдæг куыд зæгъы, афтæмæй ма йын ныр дæр æнкъары йæ фæстиуджытæ. Сырх дзуары программæйы архайыны фæндон æм куы бацыди, уæд сразы. Фыццаг фæлтæры фæстæ снысан кодта, дыкккаг хатт дæр та кæй æрбацæудзæн, уый.
Улæфæнты гимнастикæйæ уæлдай ма дзы ис кардио фæлтæрæнтæ, стæй скандинаваг цыд. Специалисттæ зæгъынц, адæймагæн дзы бирæ кæй фенцондæр вæййы, уый. Семæ кусынц куыд иумæйаг къордты, афтæмæй хицæнтæй дар.
Сырх дзуар ацы программæ царды рауагъта æрæджы. Кусынц дзæбæхгæнæн-физкультурон диспансеры бындурыл. Чи дзы архайы, уыдон сты алы кары. Рæстæмбисæй курс у æртæ мæйы. Ацы аз хъуамæ аххæссой 4 сæдæ адæймагыл.
Программæйы архайынц Уæрæсейы Сырх Дзуары 40 регионалон хайады, се хсæн Цæгат Ирыстон дæр. Хæрзаудæн организацийыл ацы аз æххæст кæны 155 азы. Апрелы сфидар кодта проект «Фыццаг æххуыс». Разæй ма йæм æнхъæлмæ кæсы бирæ ног программæтæ.
