Сæйрагдæр бынат дзы ахсынц ирон къабаты дизайнертимæ иумæйаг куыстытæ. Куклатæ аивгонд сты традицион национ уæлæдарæсæй
Традицион орнамент, аивдзинад æмæ граци. Дзæуджыхъæуы байгом куклаты равдыст. Сæйрагдæр бынат дзы ахсынц ирон къабаты дизайнертимæ иумæйаг куыстытæ. Куклатæ аивгонд сты традицион национ уæлæдарæсæй. Не сфæлдыстадон къорд йæхи цæстæй федта, дизайнертæ национ къабатæ адæмы размæ миниатюрæты куыд рахæссынц, уыцы процесс. Бæстондæр радзурдзæн Касаты Наирæ.
Ирд фæлгонцтæ, алыхуызты уæлæдарæс, аив гуырыконд. Ам фенæн ис аргъæутты хъайтартæ æнахуыр цымыдисаг, ахуыр кæуыл не стæм, ахæм хуызы, уыимæ сты национ тематикæимæ баст. Баиу дзы сты аивадон стиль æмæ авторты хæдбындур æууæлтæ. Куклаты сæрыфастæй райдай, сæ уæлæдарæсы элементтæ, орнамент… алцыппæтæн дæр ис сакралон мидис. Мастертæ сæ алы куысты дæр бавæрдтой арф хъуыды æмæ сæ зæрдæйы хъарм. 20 куыстæй фылдæр. Алкæцыйæн дæр йæхи истори æмæ миниуджытæ.
Формæ кæмæн нæй, ахæм хомаг, мастеры къухы дзы цыма уд бацæуы, адæймагмæ афтæ кæсы, афтæмæй свæййы аивадон уацмыс. Лыстæг куыстытæ куы фæвæййынц, æмæ кукла йæ хуыз куы равдисы, уæд адæймаджы дисы бафтауы кæронбæттæн хатдзæг. Ацы иксклюзивон куклатæ сты алы кары минæвæртты бæллиц дæр.
Автортæй иу, уыцы иу рæстæг равдысты партнер дæр – зындгонд дизайнер Годжысаты Изольдæ. Йæ командæимæ иумæ куклатæн хуыйынц уæлæдарæс. Ирон национ къабайы авидзинад дизайнертæ равдисынц миниатюрæйы, бахъахъхъæнынц дзы традицион нывæфтыды алы æууæлтæ. Æрдзон дуртæ, хуыздæр чи у, ахæм хъуымæцтæ, къухæй конд æппæт фæзилæнтæ. Алы кукла дæр свæййы культурон хæзнайы иу хай.
Авторон куклаты равдыст ахæсдзæн 2 мæйы. Дзиуаты Земфирæ йæ размæ вæры ног хæстæ æмæ нысантæ, сæ сæйрагдæр – аивады ацы къабаз Цæгат Ирыстоны парахат кæнын, цæмæй алы адæймагæн дæр фадат уа Кавказы адæмты хæдбындур культурæйы тæвагыл бандзæвынæн.
