Сæйрагдæр нывгæнæг равдисы хæххон Ирыстоны пейзажтæ æмæ Дзæуджыхъæуы рагон хуызы нывтæ
Цæгат Ирыстоны нывгæнджыты цæдисы равдыстытæ аразæн залы байгом нæ республикæйы сгуыхт нывгæнæг Саулаты Сергейы куыстыты равдыст «Пауза». Паузæ та уымæн, æмæ фæстаг аз не хсæнады пандемияйы аххосæй цы уæгъд рæстæг фæзынд, уый нывгæнæг арвыста пайдаимæ. Саулаты Сергейы нывтæ конд сты хицæн техникæйы – нывкæнынад, графикæ, акварель æмæ чиныджы иллюстрацитæ. Сæйрагдæр нывгæнæг равдисы хæххон Ирыстоны пейзажтæ æмæ Дзæуджыхъæуы рагон хуызы нывтæ. Уæдæ стыр æргом здахы адæммæ дæр. Уарзы сурæттæ аразын. Профессионалты хъуыдымæ гæсгæ, Саулаты Сергей ацы жанры нымад у хуыздæр автортæй иуыл. Сергей каст фæци Цæгат Ирыстоны паддзахадон университеты аивæдты факультеты нывкæнынады хайад. Бирæ хæттыты архайдта егъау проектты. Се хсæн – Намысы Мемориалы зæрдылдарæн къул, Алагиры аргъуаны æмæ æндæр ахсджиаг объектты. Ныртæккæ мастер ахуыргæнæгæй кусы Дзанайты Азанбеджы номыл Дзæуджыхъæуы аивадон училищæйы. Ацы равдыст та фенæн уыдзæн 20-æм июлы онг.
