Фенæн дзы ис, бирæ азты дæргъы сывæллæтты жæрнал «Ногдзау»- æн иллюстрацитæ чи кодта, уыцы авторты куыстытæ
Нывкæнынад, графикæ, хи конд куклатæ. Дзæуджыхъæуы байгом равдыст «Нывгæнджытæ-сывæллæттæн». Фенæн дзы ис, бирæ азты дæргъы сывæллæтты жæрнал «Ногдзау»- æн иллюстрацитæ чи кодта, уыцы авторты куыстытæ. Бæлвырддæр радзурдзæн Чехойты Фатимæ.
Ивгъуыд æнусы 30-æм азты фыццаг иллюстрацитæй райдай æмæ нырыккон сфæлдыстадон куыстытæй фæуы. Ахæм равдыст саразын журнал «Ногдзау»-ы аивадон редактор Дзиуаты Земфирæ рагæй фæнд кодта. Оригиналон иллюстрацитæ иумæ æрæмбырд кæнын – уый æрмæст сфæлдыстадон мадзал нæу, фæлæ ма журналы рæзт æвдисæг дæр. Земфирæ дарддæр æххæст кæны, йæ фыд Дзиуаты Батраз журналы цы сфæлдыстадон куыст кодта, уый. Æрмæст Дзиуаты мыггаджы дыууæ фæлтæр баст не сты «Ногдзау»-имæ. Ахæм дæнцæгтæ ма æрхæссæн ис иннæ мыггæгтæй дæр, дыгай фæлтæртæй журналы рауагъдыл чи куыста, ахæмтæ. Уый та æххуыс у «Ногдзау»-æн азæй азмæ цымыдисагдæр уæвынæн.
Уникалон равдыст «Нывгæнджытæ-сывæллæттæн» байгом нывгæнджыты Цæдисы. Журналæн конд иллюстрацитæй уæлдай ма дзы фенæн ис авторты æндæр сфæлдыстадон куыстытæ дæр. Нывкæнынад, графикæ, хи конд куклатæ. Эспозицийы ис 20 зындгонд нывгæнæджы 100 куысты. Сæ автортæ сты Джыккайты Мурат, Абайты Аркадий, Мамсыраты Хасан æмæ Айларты Владимир.
Ацы аз сывæллæтты журнал «Ногдзау»-ыл сæххæст 87 азы. Йæ фæрстыл мыхуыргонд уыдысты Ирыстоны бирæ зындгонд поэтты æмæ фысджыты уацмыстæ. 1985 азæй 2018 азмæ йæ редактор уыд Дзасохты Музафер. Уый ныр дæр йæ уарзон журналы редакцийы кæны сфæлдыстадон куыст.
Равдыст кадджын уавæры байгом кодтой. Журнал рæзы. Кæд зындзинæдтæ дæр æййафы, уæддæр цардимæ æмдзу кæны. Ахæм мадзæлттæ – уый æвдисæг.
«Нывгæнджытæ-сывæллæттæн» – равдыст цымыдисаг уыдзæн алы кары адæмæн. Хонынц æм æнæхъæн бинонты. Ахæсдзæн 7 ноябрьмæ.
