Бæрæгбоны концерт уыд фæсивæды галуаны
Бинонты традицион хæзнатæ бахъахъхъæнын. 2024-æм азы республикæйы уыд бинонты азы темæимæ баст бирæ мадзæлттæ. Æдæппæтæй ацы аз Цæгат Ирыстоны нысангонд æрцыд 2 мин 500 къайæ фылдæр, райгуырд 7 мин сывæллоны онг. Бинонты аз республикæйы сæхгæдтой бæрæгбоны концертæй Фæсивæды галуаны. Бæлвырддæр хабæрттæ радзурдзæн Хъайтмазты Дзерассæ.
«Бинонты аз» кæронмæ æрхæццæ кæны. Уый кадæн æппæт Уæрæсейы арæзт цæуынц, ацы темæимæ баст мадзæлттæ. Дзæуджыхъæуы «Бинонты азæн» фæндараст зæгъынæн æрæмбырд бирæ уазджытæ. Бæрæгбоны концерт уыд фæсивæды галуаны. Æмæ уымæн ис сæрмагонд нысаниуæг. Ахсджиаг у, фæсивæды ахуыр кæнын бинонты хæзнатæн аргъ кæныныл. Концерты архайджытæн раарфæ кодта Хицауады сæрдары хæдивæг Платы Альбинæ.
Концертон программæ уыд цымыдисаг. Артисттæ адæмы размæ рахастой кафæн номертæ, азарыдысты тематикон композицитæ.
Сывæллæттимæ бинонтæн социалон æххуысы мадзæлтты системæйы райрæзт – ацы ахсджиаг хъуыддагыл куыст цæуы æрвылаз. Ацы аз бирæсывæллонджын бинонты царды уавæртæ фæхуыздæр кæнынæн чысыл конд не рцыд, æмæ дарддæр конд цæуы. Кадджын мадзалы ноггуырдты ныййарджытæн саккаг кодтой лæвæрттæ, фыццагкъласонтæн та канцелярон фæрæзтæ. Куыд ма фехъусын кодтой, афтæмæй 2025-æм азы бирæсывæллонджын бинонтæй сывæллæтты скъолайы уæлæдарæсæй æххæст кæндзысты лæвар.
Мæйы размæ «Мад-хъæбатыр»-ы кадджын ном лæвæрд æрцыд республикæйы 4 цæрæгæн. Уыдон сты Ирина ЧернЕга, Галина Бойко, Чочиты Майæ æмæ Гегкиты Фатимæ.
Уæлдай зæрдæагайæг уыдысты фронтæй видеоарфæтæ. Сæрмагонд æфсæддон операцийы архайджытæ ныффыстой видеороликтæ. Уыдоны загътой зæрдæбын ныхæстæ сæ мадæлтæн, хотæн æмæ бинойнæгтæн.
Бинонтыл узæлд æмæ сын æххуыс стыр ахъаз у сывæллæтты хъомылады ахсджиаг фарстайы. Бинонтæ царды сты æппæтæй стырдæр хæзна, æмæ уый кæддæриддæр хъæуы зæрдыл дарын.
