Куыстытæ æххæст кæнынц алыхуызон программæтæм гæсгæ
Дзæуджыхъæуы бирæ уынгтыл ахадгæйæ цалцæггонд цæуынц фæндæгтæ. Куыстытæ æххæст кæнынц алыхуызон программæтæм гæсгæ. Ивынц асфальт, æвæрынц бордюртæ. Куыстытæ куыд æххæстгонд цæуынц, æмæ кæд фæуыдзысты, уый тыххæй радзурдзæн нæ уацхæссæг Хъайтмазты Дзерассæ.
Ставропольскийы уынджы куыстытæ бацыдысты сæ тæмæны. 800 метры дæргъæн уаццаджы ацæуæн нæй – ам кусы арæзтадон техникæ. Ныртæккæ фæллойгæнджытæ исынц фæндаджы уæлцъар. Фæззæгмæ дзы фæзындзæн ног асфальт. Хæстæгдæр рæстæг рахиздзысты рацарæзты дыккаг къæпхæнмæ. Ныр та бынаты кусы 2 экскаваторы, 10 уæзласæн машинæйы ласынц, цы асфальт систой, уый. Куыстытæ хъуамæ фæуой сентябры, фæлæ уал æххæстгонд цæуынц æмгъуыдæй раздæр.
Федералон программæ «Æдас æмæ хæрзхъæд фæндæгтæм» гæсгæ ацы сæрд горæты фæнд кæнынц базилын 25 уынгмæ. Се хсæн – Грибоедовы, Тургеневскийы, Весенняя, Галковскийы, стæй Коцойты Арсены уынг. Муниципалон программæмæ гæсгæ ма ныртæккæ цалцæггæнæн куыстытæ æххæстгонд цæуынц 11 уынджы, хæстæгдæр рæстæг та ма базилдзысты ноджыдæр уыйбæрцмæ. Къæвдатæ арæх кæй уыд, уый аххосæй куыстытæ æрæджы райдыдтой, фæлæ хатдзæгтæ ныридæгæн зынынц.
Дербентскийы уынджы бирæ азты дæр фæндаджы уавæр зæрдæмæдзæугæ нæ уыд, ныр ам кусы арæзтадон техникæ. Цæрджытæ æнхъæлмæ кæсынц ног асфальтмæ.
Цалцæггæнæн куыстытæ цæуынц Магкаты Зурабы уынджы дæр. Ам æвæрынц бордюртæ. Куыстыты хай фæнд кæнынц фæззæджы райдианмæ сæххæст кæнын, даргъ уынгты цалцæг та фæуыдзæн чысыл фæстæдæр.
