50 азæй фылдæр бæстыхай цалцæггонд нæ уыд
Дзæуджыхъæуы бындурон цалцæджы фæстæ байгом сывæллæтты сфæлдыстады республикон галуан. 50 азæй фылдæр бæстыхай цалцæггонд нæ уыд. Баивтой галуаны сæр, сæххæст кодтой мидкуыстытæ. Ацы хъуыддаг сбастой сывæллæтты хъахъхъæныны æппæтадæмон бонимæ. Бæлвырддæр радзурдзæн Хъайтмазты Дзерассæ.
Сырх хъуырбæттæнты æмæ цæхæр цæстытимæ, ногдзауты хуызæн, сывæллæттæ тагъд кæнынц цалцæггонд галуан фенынмæ. Цалдæр азы фæстæ та дзы цард йæ тæмæны бацыд. Уый у, дæргъвæтин æмæ бындурон куыстыты хатдзæг. Аргъ сын скодтой ахуырады æмæ наукæйы министр Алыбекты Эллæ æмæ Хицауады сæрдар Дзанайты Барис. Уый раарфæ кодта галуаны педагогтæн æмæ хъомылгæнинæгтæн.
Алыбекты Эллæ – РЦИ-А ахуырады æмæ наукæйы министр: «Дом пионеров, Дворец Пионеров… Мы его по-разному называем. Он всегда был точкой притяжения для всех детей нашей республики. Сюда приходят уже 51 год дети со всей республики . Благодаря поддержке нашего главы, нашего председателя, нашего Президента дворец отремонтирован. И, безусловно, сегодня созданы абсолютно современные условия».
Уавæртæ аразын ам райдыдтой 2022-æм азы августы. Бæстыхай хъуыд бындуронæй сцалцæг кæнын. Базилинаг уыдысты æрмæст актон, спортивон æмæ кафæн залтæ нæ… Баивын хъуыд бæстыхайы сæр. Сног кодтой дуæрттæ, рудзгуытæ, æппæт коммуникацитæ. Фæлæ сæйрагдæр æнæивгæ баззадысты, нырма сывæллæтты сфæлдыстады республикон галуаны фыццаг директор Гуыцмæзты Аннæ цы традицитæн бындур сæвæрдта, уыдон. Ацы бынатмæ йæм кæддæриддæр сæрмагонд зæрдæйы ахаст уыд.
Бирæ ногдзинæдтæ базонын æмæ афæлварын кæй фæнды, ахæм сывæллæттæ республикæйы чысыл нæй. Уыдонæн галуаны дуæрттæ кæддæриддæр гом сты.
Уый у галуаны сæйраг нысан. Раргом кæнын фылдæр курдиæттæ, æмæ сывæллæтты сабибонтæ цымыдисагдæр скæнын.
