Уыдзæн дзы æдасдзинады фæзтæ, къахвæндæгтæ, ног фæндаггон нысантæ
Дзæуджыхъæуы Чкаловы уынджы хиды активонæй цæуынц фæндаггон куыстытæ. Уыдзæн дзы æдасдзинады фæзтæ, къахвæндæгтæ, ног фæндаггон нысантæ. Уыимæ фæндагыл уыдзæн 6 рæнхъы. Ныртæккæ уал куыстытæ цæуынц хиды иу фарс. Зæгъдзыстæм ма уый дæр, æмæ цалцæг цæуы Цæгат Ирыстоны Фæндаггон фонды фæрæзты фæрцы. Рацарæзт куыд цæуы, уый тыххæй бæстондæр радзурдзæн Хъайтмазты Дзерассæ.
Мамсыраты Хаджумары æмæ Чкаловы уынгтæ цы хид иу кæны, уый реконструкцимæ арæзтадон бригад æрæджы бавнæлдта. Ныртæккæ кæнынц зæххы куыстытæ. Специалисттæ цæттæ кæнынц фидæны фæндаджы бындур, стæй ма уæрæхдæр кæнынц хидмæ бацæуæнттæ. Афæдзы кæронмæ сæ æдæппæтæй хъæуы сног кæнын 550 метры дæргъæн уаццаг.
Куыстытæ уыцы иу рæстæг цæуынц Мамсыраты Хаджумары æмæ Чкаловы уынджы дæр. Æххæст сæ кæнынц рæвдз. 25 адæймаджы æмæ техникæйы 30 иуæджы. Подрядон организацийæн проект зын нæу. Республикæйы ныридæгæн арæзтой хидтæ æмæ алы категориты фæндæгтæ. Бригады хыгъды сты фæлтæрдджын кусджытæ. Цалынмæ иутæ уæлцъар раст кæнынц, уæдмæ иннæтæ бæлвырд кæнынц фæндаджы сæмæн. Роботизацигонд тахеометры фæрцы уыцы куыст æххæст кæнынц геодезисттæ. Уыдонæй райдайы арæзтад, æмæ уыдонæй фæвæййы.
Ацы хид эксплуатацимæ радтой 20 азы онг размæ. Зæгъын хъæуы уый, æмæ уæд проект æххæстæй фæуын афтæ дæр нæ бантыст цæрæн хæдзæртты тыххæй. Уыдон уыдысты инженерон арæзтадмæ бацæуæнтæ хъуамæ кæм уыдаид, уым. Ныртæккæ фарста лыггонд æрцыд.
Реконструкцийы фæстæ хидæн уыдзæн раст геометри. Цæуын ыл уыдзæн æдасдæр æмæ æнцондæр, машинæтæ та дзы къаддæр æмбырд кæндзысты.
Цалынмæ арæзтад цæуы, уæдмæ шофыртæ цæттæ сты бафæразынмæ. Уымæн æмæ ацы хидæн горæты транспортон инфраструктурæйы стыр нысаниуæг ис. Арæзтад иу кæны 2 стыр районы. Объект реконструкцигонд цæуы национ проект «Цардæн инфраструктурæ» æххæстгæнгæйæ.
