Бацæуæнты æмæ арæзтадыл цæттæ кæнынц æдасдзинады рæнхъытæ, къахвæндæгтæ, æвæрынц ног фæндаггон нысантæ
Дзæуджыхъæуы Чкаловы уынджы хидыл дарддæр цæуынц фæндаггон куыстытæ. Бацæуæнты æмæ арæзтадыл цæттæ кæнынц æдасдзинады рæнхъытæ, къахвæндæгтæ, æвæрынц ног фæндаггон нысантæ. Змæлд цæудзæн 6 рæнхъмæ гæсгæ. Ныртæккæ специалисттæ куыстытæ фесты хиды рахиз фарсыл. Бæлвырддæр радзурдзæн Хъайтмазты Дзерассæ.
Хиды галиу фарс цæттæ кæнынц аив кæнынмæ. Зæххы куыстытæ æххæст кæнынц бацæуæнты. Аразджытæ иу иннæйы фæдыл исынц зæронд асфальты уæлцъар, цæмæй сфидар кæной машинæтæ цæуæн хайы бындур. Уыцы иу рæстæг иннæ уаццагыл цæуы саст конструкциты рацарæзт. Хиды бын цæуынц ахорæн куыстытæ.
Хиды бын хай сног кæнынæн специалистты бахъуыд рæстæгмæ аивын цæугæдоны донвæд. Объекты цалцæггæнæн процесс зындæр кæны бирæ коммуникацитæ кæй ис, уый. Фæлæ, куыстытæ тагъд цæуынц. Цалцæггонд цæуы 550 метрæй фылдæр дæргъæн объект. Уыимæ транспорты цыд не рлæууыд. Шофыртæ куыд зæгъынц, афтæмæй цæттæ сты зындзинæдтæн бафæразынмæ.
Цалцæджы фæстæ хидыл змæлд суыдзæн æрмæст æнцонвадатдæр нæ, фæлæ æдасдæр, зæгъынц специалисттæ. Эксплуатацийы йæ радтой 15 азы онг размæ, аразгæ та йæ скодтой раздæр. Бирæ рæстæг лыггæнинаг уыд хидмæ бацæуæнтæ саив кæныны фарста. Объекты ацы уаццаджы реконструкцимæ бавнæлдтой æрмæст ацы аз. Куыстыты фæстæ йæ арæзт райсдзæн раст хуыз. Æмтгæй райсгæйæ, Цæгат Ирыстоны 6 азмæ национ проекттæм гæсгæ сног кодтой æмæ сарæзтой бирæ ахæм объекттæ.
Мамсыраты Хаджумары æмæ Чкаловы уынгты кæм баиу сты, уыцы хидыл куыстытæ æххæстгонд сты 50 процентæй фылдæр. Арæзтадон организаци ма сæвæрдта аразгæ рухсыты 4 уæлæмхасæн объекты. Ам базылдысты къахвæндæгтæм æмæ бырутæм дæр.
