Муниципалон программæмæ гæсгæ, Дзæуджыхъæуы ныридæгæн сæвæрдтой 8 ахæм фæзы, æдæппæтæй та уыдзысты 18
Дзæуджыхъæуы дарддæр æххæстгонд цæуы, территоритæ спортивон æмæ сывæллæтты хъазæн фæзтæй æххæст кæныны хъуыддаг. Муниципалон программæмæ гæсгæ, Дзæуджыхъæуы ныридæгæн сæвæрдтой 8 ахæм фæзы, æдæппæтæй та уыдзысты 18. Дзуапп дæттынц æдасдзинады домæнтæн. Бæлвырддæр радзурдзæн Хъайтмазты Дзерассæ.
Къостайы проспекты 278-æм хæдзары сывæллæтты ног фæзыл цин кæнынц канд рæзгæ фæлтæр нæ, фæлæ ныййарджытæ дæр. Качелитæ кæрты никуы уыд. Фæлæ хистæрты æрхъуыдыйы фæрцы, сывæллæттæн уæддæр уыд, къуыбырæй æрбырыны фадат. Зæгъын хъæуы уый, æмæ хиконд уыдысты. Абон ам ис æнæхъæн хъазæн комплекс. Рæсугъд, ирд, алывæрсыг æмæ, сæйрагдæр та – æдас.
Горæты территоритæ ифтонг æмæ аив кæныны куыст дарддæр æххæстгонд цæуы. Доваторы проспекты 25-æм хæдзары дæр æвæрд æрцыд спортивон фæз.
Бынæттон хиуынафæййады администраци сбæлвырд кодта 45 кæрты территориты уавæр. Уыцы хъуыддаг æххæстгонд æрцыд Дзæуджыхъæуы инвестицион программæмæ гæсгæ. Горæты администрацийы бындурон арæзтады управленийы хайады хицауы хæдивæг Тезиаты Уырызмæг куыд загъта, афтæмæй 8 адрисмæ гæсгæ куыстытæ ныридæгæн фесты.
Дзæуджыхъæуы ма фæзынд 5 ног фæзы тренажертимæ воркаутæй архайынæн. Дзуапп дæттынц æдасдзинады домæнтæн. Æппæт фæзтæ сæвæрынæн радих кодтой 15 милуан сомы бæрц. Цæмæй сæм дарддæр зилой, уый тыххæй лæвæрд æрцæудзысты куыстуат «СпецЭкоСервис»-мæ.
