Экспозици «Прогулка»-мæ хаст æрцыдысты горæтаг æмæ хæххон пейзажтæ, стæй портреттæ
Дзæуджыхъæуы дарддæр кусы Цæгат Ирыстоны сгуыхт нывгæнæг Ульяна Гончаровайы куыстыты равдыст. Экспозици «Прогулка»-мæ хаст æрцыдысты горæтаг æмæ хæххон пейзажтæ, стæй портреттæ. Ульянæ йæ хæсыл нымайы алы нывы дæр йе *нкъарæнтæ равдисын. Равдыст бабæрæг кодта не сфæлдыстадон къорд.
Цæгат Ирыстоны сгуыхт нывгæнæг Ульяна Гончарова аивадуарзджыты хоны горæты уынæрæй дард тыгъдадмæ, зæрдæйæн æхцон æнкъарæнтæ райсынмæ. Йе сфæлдыстадæн аргъгæнджытæн бæлвырд мидис бамбарын кæнын нæ уыд йæ хæс. Нывгæнæджы ныхæстæм гæсгæ, равдыст фенгæйæ алы адæймагмæ дæр сæвзæрдзысты йæхи хъуыдытæ, фæзындзæн æм йæхи цæстæнгас.
Ульяна Гончаровайы куыстытæ конд сты нывкæнынады алы хуызты. Аивадуарзджытæ федтой хохаг æмæ горæтаг пейзажтæ, стæй портретон экспозицитæ. Цалдæрыл дзы нывгонд ис йæ чызг Æхболæтты Мария. Уый азæй азмæ уыны, йæ мад цы сфæлдыстадон куыст кæны, уый. Чызджы йæ ныййарæг разæнгард кæны дунейы рæсугъддзинад æмæ царды хуыздæр мысинæгтæ нывкæнынады руаджы хъахъхъæнын. Мария ахуыр кæны аивæдты лицейы. Фæнды йæ, йæ мады хуызæн, нывгæнæг суæвын.
Ульяна Гончаровайы цардæмбал Æхболæтты Æхсарбег дæр йæ цард сбаста аивадимæ. Баиу сæ кодта сфæлдыстад. Æхсарбег тынг разы у йæ бинойнаджы аивадон æрмдзæфæй, йæ куыстытæ йын сæрыстырæй вдисы адæмæн.
Нывгæнæджы куыстытæ сты Уæрæсейы æмæ фæсарæнты цæрджыты хи коллекциты. Ульяна Гончарова саразы хицæн равдыстытæ, фæархайы æппæтадæмон проектты. Цæгат Ирыстоны нывгæнджыты Цæдисы сæрдар Мæргъиты Таймураз Ульяна Гончаровайы нымайы, æххæстæй йæ уарзон горæты рæсугъддзинад равдисын йæ бон кæмæн у, ахæм курдиатджын нывгæнæгыл.
50 куыстæй фылдæр. Алкæцыдæр æххæст у йæхи хъуыдыйæ. Адæмæн равдысты тыгъдады сæ миддуне бамбарын æмæ Ульяна Гончаровайы куыстытæй зæрдæтæ барухс кæныны фадат уыдзæн 18 январы онг.
