Йæ бæрзæнд 210 метры кæмæн уыдзæн, йæ иумæйаг уæз та иу мин 500 тоннæйы – ахæм конструкци
Дзæуджыхъæуы дарддæр цæуы телемæсыджы арæзтад. Йæ бæрзæнд 210 метры кæмæн уыдзæн, йæ иумæйаг уæз та иу мин 500 тоннæйы – ахæм конструкци. Ам зæгъын хъæуы уый, æмæ уымæй уæззаудæр у æрмæстдæр Останкинойы мæсыг. Проекты автортæ зæрдæ æвæрынц, цæгатирыстойнаг мæсыг кæй бафæраздзæн цыфæнды уæлдæфы температурæйæн æмæ тыхджын дымгæйæн. Уымæй дарддæр регион ифтонг кæндзæн хæрзхъæд нымæцон телеуынынадæй, стæй ма суыдзæн, Цæгат Ирыстоны ног символ дæр. Мæсыг арæзт цæуы, абарæн кæмæн нæй, ахæм хуызы. Фыццаг секцитæ æмбырд кодтой зæххæй. Пайда кодтой хæрдæмисæн кранæй. Уыйфæстæ та объектыл сæвæрдтой, йæхæдæг йæхи чи исы, ахæм егъау кран. Фидаргонд цæуы æфсæйнаг тростыл, æмæ йæ бон у 9 тоннæйы бафæразын. Цалынмæ монтаж цæудзæн, уæдмæ кран исдзысты уæлдæрæй уæлдæр. Зæгъдзыстæм ма уый дæр, æмæ телемачтæйы конструкци кæнгæйæ, хыгъд цыдысты нæ регионы сейсмикон уавæртæ, æмæ йыл кæй сæвæрдзысты, уыцы техникæйы уæз. Ног мæсыг хицæн кæны нырыккон дизайнæй. Аивадон рухсгæнæнтæ фадат ратдзысты ног голографион нывтæ аразынæн. Æппæт куыстытæ нысан кæнынц ацы азы кæронмæ фæуын.
