Афтæ «Адæмон фронты пырх фæндæгты картæйы» нал сты Ленины, Ватутины æмæ Калоты Зауырбеджы уынгтæ
Дзæуджыхъæуы дарддæр цалцæггонд цæуынц фæндæгтæ. Афтæ «Адæмон фронты пырх фæндæгты картæйы» нал сты Ленины, Ватутины æмæ Калоты Зауырбеджы уынгтæ. Сæвæрдтой дзы ног асфальт, пандустæ, баивтой бордюртæ æмæ снывыл кодтой, уарындæттæ кæдæм цæуынц, уыцы бынæттæ. Æхсæнадон эксперттæ куыстытæй разы сты, æви нæ, уый базоныныл бацархайдта не сфæлдыстадон къорд, æмæ бæлвырддæр хабæрттæ радзурдзæн Касаты Наирæ.
Арф дзыхъхъытæ æмæ фаз фæндæгты бæсты раст асфальт. Калоты Зауырбеджы номыл уынджы къуырийы размæ æвæрд æрцыди фæндаджы ног уæлцъар. Хæстæгдæр бонты та дзы райдайдзысты фæндаггон нысантæ æвæрын. Дыууæ мæйы размæ дæр ма ацы фæндагыл машинæтæ цыдысты къуылымпыдзинæдтимæ, иувæрсты иу зылдысты дзыхъхъытæй. Ныр та дзы фæзынд раст, æдас фæндаг. Бирæ рæстæг сцалцæггæнинаг уыди Ленины уынджы фæндаг дæр. Горæты центры машинæты цыд зæгъæн ис, æмæ у æнæрлæугæ, фæлæ уыцы иу рæстæг æвзæрын кæны зындзинæдтæ дæр. Асфальт пырх кæй уыди, уый та ма фæндаггон змæлд къуылымпы кодта ноджы тынгдæр. Фæндаджы ацы хай хаст æрцыди «Адæмон фронты пырх фæндæгты картæмæ». Æрæджы горæты администраци фæндаджы ацы уаццаг бахаста бындурон цалцæджы пъланмæ. Сарæзтой дзы къахвæндæгтæ, снывыл кодтой, къæвдаты дæттæ кæдæм цæуынц, уыцы бынæттæ.
Ахæм уавæримæ сæмбæлдысты Ватутины уынджы цæрджытæ дæр. Фæлæ ам, машинæтæй уæлдай пырх уыдысты къахвæндæгтæ дæр. Сывæллоны коляскæимæ дзы ацæуæн уыди тынг зын. Ныр уынгмæ базылдысты. Сæвæрдтой дзы ног асфальт, пандустæ, аивтой дзы бордюртæ. Адæмон фронт æркасти æмæ аргъ скодта куыстытæн.
Адæмон фронты проект «Пырх фæндæгты картæ» кæдæй кусы, уæдæй нырмæ, цалцæггонд æрцыди 67 объекты. Фæлæ ма йæ хыгъды нырма дæр ис 225 объекты, сты Дзæуджыхъæуы æмæ республикæйы районты.
