Рынчынтæн консультацитæ скодтой республикæйы клиникон рынчындоны
Дзæуджыхъæуы дыууæ боны уыдысты Бакулевы номыл зæрдæйы æмæ тугдадзинты медицинон центры специалисттæ. Рынчынтæн консультацитæ скодтой республикæйы клиникон рынчындоны. Дохтыртæ æркастысты, Мæскуымæ ацæуын кæй бон нæу, ахæм сывæллæтты æмæ хистæр кары адæмы æнæниздзинадмæ. Сбæрæг кодтой, бæрзонд технологон операцитæ кæмæн скодтой, ахæм рынчынты уавæр дæр. Лæвар консультацитæ скодтой, зæрдæйы низтæ кæмæ ис, зæгъæм аритмийæ, кæнæ йæ тугдадзинты уавæр хорз кæмæн нæу, ахæм адæмæн. Дохтыртæ сын бæлвырд пълан скодтой сæ дарддæры дзæбæхгæнæн мадзæлттæн. Бакулевы центры специалисттæ республикæ бабæрæг кæнынц, адæмы æнæниздзинад хуыздæр кæныны программæйы фæлгæты, æнæниздзинадхъахъхъæнынады министрады хуындмæ гæсгæ. Æркасты фæстæ рынчынты фæдзæбæх кæнынц паддзахадон бюджеты фæрæзтæй.
