Æнæнхъæлæджы уавæрты министрады ирвæзынгæнджытæ канд арт нæ ахуыссын кодтой, фæлæ ма дуканийы кусджытæн радзырдтой, æнæнхъæлæджы уавæрты куыд архайын хъæуы, уый тыххæй
Зынгсирвæзты рæстæг куыд архайын хъæуы, æмæ, чи ссыгъди, уыцы бæстыхайы куыд рацæуæн ис? Дзæуджыхъæуы егъау базарадон центртæй иуы арæзт æрцыдысты зынгсирвæзтыты ныхмæ тактикон ахуыртæ. Æнæнхъæлæджы уавæрты министрады ирвæзынгæнджытæ канд арт нæ ахуыссын кодтой, фæлæ ма дуканийы кусджытæн радзырдтой, æнæнхъæлæджы уавæрты куыд архайын хъæуы, уый тыххæй. Инструктаж куыд ацыд, уый тыххæй бæстон радзурдзæн Фидараты Маринæ.
Æрхъуыдыгонд цаумæ гæсгæ зынгсирвæзт æрцыд Дзæуджыхъæуы егъау базарадон центртæй иуы скълады. Арт апарахат, æмæ йæ ахуыссын кæнынæй дарддæр хъæуы, бæстыхайы чи баззад, уыцы адæмы аирвæзын кæнын. Ахуырты архайынц æнæнхъæлæджы уавæрты министрады ирвæзынгæнджытæ стæй тагъд æххуысы бригадтæ. Æдæппæтæй 82 адæймаджы æмæ сæрмагонд техникæйы 16 машинæйы. Æвæстиаты службæтæн се штаб æрбынат кодта дуканимæ бацæуæны раз.
Ацы бон канд ирвæзынгæнджыты архайд нæ бæрæг кодтой, фæлæ ма супермаркеты кусджыты арæхстдзинад дæр. Уыдон та сæ хæстæ сæххæст кодтой, куыд æмбæлы, афтæ. Ирвæзынгæнджытæ сын бæстон радзырдтой, зынгсирвæзты рæстæг хи куыд дарын хъæуы, уый тыххæй. Арт ахуыссын кæнын бантыст 25 минутмæ. Уый нормæтæн дзуапп дæтты.
Ахæм ахуыртæ арæзт фæцæуынц алы кварталы дæр. Уыимæ алыхуызон базарадон объектты. Ирвæзынгæнджытæ хъуамæ кæддæриддæр уой цæттæ зынгсирвæзты ныхмæ тох кæнынмæ.
