Ноябры райдайдзысты проект аразын.
Дзæуджыхъæуы Евгений Вахтанговы хæдзар-музейы рацарæзты фыццаг къæпхæн кæронмæ æрхæццæ. Ноябры райдайдзысты проект аразын. Уый тыххæй радзырдтой мæскуыйаг уазджытæ. Дзæуджыхъæумæ ссыдысты Евгений Вахтанговы номыл мæскуыйаг театры минæвæрттæ. Фыццаджыдæр уазджытæ дидинджытæ сæвæрдтой зындгонд режиссеры цыртдзæвæныл. Фембæлдысты Цæгат Ирыстоны сæргълæууæгимæ. Аныхас кодтой Евгений Вахтанговы хæдзар-музей саразыныл. Куыстытæн фæрæзтæ радих кодтой федералон бюджетæй.
Татьяна Багдасарянц кадджын уазджытыл сæмбæлд йæ хиуæтты хуызæн. Ацы хæдзары фæцарди 50 азæй фылдæр. Ныр та дзы уыдзæн ног хицæуттæ. Зындгонд режиссер Евгений Вахтангов кæм райгуырд æмæ схъомыл, уыцы хæдзар хъуамæ суа æцæг культурон центр. Проекты фыццаг къæпхæн уыди æппæтй зындæр. Баныхас кæнын хъуыди фатерты 13 хицауимæ.
Армянскийы æмæ Байаты Гаппойы уынгты тигъыл бæстыхай кæлæддзаг уавæры ис бирæ рæстæг. Советон дуджы йæ суанг акалынмæ дæр хъавыдысты. Режиссеры хæдзар бахъахъхъæнын ракуырдтой æстайæм азты, фæлæ проект царды рауадзын бантыст æрмæст ныртæккæ.
Ноябры райдайдзысты проект царды уадзын. Ныртæккæ уал æмбæлгæ куыстытæн кæнынц аргъ. Фидæны азы кæрон нысан кæнынц культурон центр байгом кæнын. Дыккаг уæладзыджы уыдзæн равдыстытæ аразæн бынат æмæ музей. Фыццаг уæладзыджы та уыдзæн концерттæ аразæн фæз сценæимæ.
Проект куыд æххæстгонд цæудзæн, уый тыххæй мæскуыйаг театры делегаци æрныхас кодтой республикæйы сæргълæууæгимæ фембæлды.
Проект арæзт æрцæудзæн федералон программæйы фæрæзтæй. Вахтанговы номыл мæскуыйаг театры сæдæ азы сбæрæг кæныны мадзæлттæ æххæст кæнгæйæ. Культурон центры нысан кæнынц аивады дунейæ алыхуызон адæмимæ фембæлдтытæ аразын.
Вахтанговы номыл театры артистты Ирыстонимæ бæттынц рагон хæлар ахастдзинæдтæ. Нырæй фæстæмæ та уыдзысты фидардæр æмæ æнгомдæр.
