Архайдта дзы мин æмæ 500 адæймагæй фылдæр
Дзæуджыхъæуы фæцис æппæтуæрæсеон фестиваль «Душа баяна»-йы регионалон къæпхæн. Архайдта дзы мин æмæ 500 адæймагæй фылдæр. 3 конкурсон боны программæ уыд хъæздыг: байхъуыстытæ, дæсныйадæвдисæг ахуыртæ, гала-концерт. Фестивалы уæлахиздзау чи сси, æмæ сæйраг приз чи райста, уый тыххæй радзурдзæн Хъайтмазты Дзерассæ.
Самарæйы облæстæй сывæллæтты ансамбль йæ 5 азы юбилей бæрæг кæны йе мгар фестиваль «Душа баяна»-имæ. Конкурсы ацы къорд фыццаг хатт нæ архайы. Цæгат Ирыстонмæ сфæлдыстадон программæимæ ссыдысты 17 адæймаджы. Уыдон сты, 2-йæ 10 азы онг кæуыл цæуы, ахæм сывæллæттæ. Ансамблы разамонæджы ныхæстæм гæсгæ, чысыл артисттимæ куыст разæнгард кæны, семæ архайд сын дæтты тых.
Мин æмæ 500 архайæджы хсæн ис бынæттон къордттæ дæр. Зæгъæм, фольклорон ансамбль «Тополек». Йæ репертуары фылдæр хъазахъхъаг зарджытæ ис. Номинаци «Хор»-ы ансамбль архайдта уацмыс «Рождество в каждый дом»-имæ. Баиу дзы кодтой ирон, уырыссаг æмæ украинаг адæмты национ музыкæ.
Ацы аз фестиваль «Душа баяна» аххæссыд Уæрæсейы 45 регионыл. 5 азмæ конкурс сси, адæмон сфæлдыстады жанры зарæггæнджытæ кæм баиу вæййынц, ахæм фæз. Профессионалты æмрæнхъ архайынц, зарын чи уарзы, уыдон дæр. Сывæллæттæ æвдисынц сæ арæхстдзинад. Ам сты солисттæ æмæ къордтæ. Алы архайæгæн дæр ис, йæ курдиат равдисыны фадат. Азæй-азмæ фестиваль уæрæхдæр кæны. Концертон программæ кæны хъæздыгдæр, цæттæдзинады æмвæзад та бæрзонддæр.
Хи хæдзары къултæ дæр æххуыс кæнынц, – фæзæгъынц. Афтæ æппæтуæрæсеон фестивалы уæлахиздзаутæ æмæ Гран-Прийы лауреаттæ систы Дзæуджыхъæуы аивæдты колледжы фæндырдзæгъдджытæ. Фестивалы аивадон разамонæджы ныхæстæм гæсгæ, сæ курдиатæй аивадуарзджыты дисы бафтыдтой. 12 номинацийы хуыздæр номерты архайджытæ, стæй Гран-Прийы лауреаттæ иннæ аз ацæудзысты Мæскуымæ гала-концертмæ. Уым рахиздзысты иу сценæмæ Уæрæсейы зындгонд зарæггæнджытимæ.
