Специалисттæ баивтой бæстыхайы сæр, зæронд коммуникацитæ, сæххæст кодтой аивгæнæн куыстытæ, стæй сæвæрдтой лифт – раздæр дзы нæ уыдис
Дзæуджыхъæуы фæцис сывæллæтты фыццæгæм поликлиникæйы бындурон цалцæг. Специалисттæ баивтой бæстыхайы сæр, зæронд коммуникацитæ, сæххæст кодтой аивгæнæн куыстытæ, стæй сæвæрдтой лифт – раздæр дзы нæ уыдис. Цалцæггæнæн куыстытæ поликлиникæйы райдыдтой ацы аз февралы. Æххæстгонд æрцыдысты национ проект «Дæргъвæтин æмæ активон цард»-ы федералон программæмæ гæсгæ. Бæлвырддæр радзурдзæн Хъайтмазты Дзерассæ.
Сывæллæтты фыццæгæм поликлиникæйы чысыл пациенттæн ныр æххуыс кæнынц ноггонд медицинон кусæнуаты. Дохтыртæ райдыдтой кабинеттæ аив кæнын, æвæрынц техникон ифтонггæрзтæ. 50 азмæ поликлиникæйы бæстыхай бындуронæй цалцæггонд нæ уыд. Фæстаг хатт дзы хуымæтæг цалцæг уыд 7 азы размæ. Æппæтæй кæлæддзагдæр уавæры уыдысты коммуникацитæ. Ныр сæ æххæстæй баивтой: вентиляционæй хъармгæнæн системæйы онг.
Поликлиникæйы бæстыхайы ис 3 уæладзыджы, алкæцыдæр сæ у ахуырст бæлвырд хуызæй. Дохтырты ныхæстæм гæсгæ, цалцæггæнæн куыстыты фæстæ ам фæзындзæн уæлæмхасæн кабинеттæ, процедурæтæгæнæн агъуыстытæ. Балхæдтой ног медицион ифтонггæрзтæ дæр. Бæстыхайы лифт никуы уыдис. Снысан æй кодтой проекты. Алцыдæр, цæмæй коляскæтимæ ныййарджытæн, стæй се нæниздзинад хъыгдард кæмæн у, уыцы сывæллæттæн æнцондæр уа уæллаг уæладзгуытæм схизын.
Бындурон цалцæджы рæстæгмæ дохтыртæ куыстой æндæр медицинон кусæнуатты бындурыл – Карцайы æмæ Южныйы. Поликлиникæ та йæ дуæрттæ куы байгом кæна, уымæ æнхъæлмæ кастысты пациенттæ дæр, æмæ специалисттæ дæр.
Зæрдæмæдзæугæ кабинеттæ, райдзаст æнхъæлмæкæсæн зонæтæ. Поликлиникæйы фæзынд диспансеризацийы кабинет дæр. Æппæт куыстытæ æххæстгонд æрцыдысты национ проект «Дæргъвæтин æмæ активон цард»-мæ гæсгæ.
