Терчы галиу фарс адих кæндзысты цалдæр тематикон зонæйыл
Зонындзинæдты фæндæгтæ, экологон зонæтæ æмæ ног транспортон артеритæ. Дзæуджыхъæуы фистæгæйцæуджыты центр рæхджы аивдзæн. Терчы галиу фарс адих кæндзысты цалдæр тематикон зонæйыл. Фæзындзысты дзы велосипедыл дугъгæнæн фæндæгтæ, сывæллæттæн ирхæфсæн фæзтæ æмæ бинонтæн фæлладуадзæн бынæттæ. Арæзт æрцæудзысты цалдæр хиды. Уыдон иу кæндзысты Терчыдоны дыууæ фарсы. Аив горæты хæстæгдæр фидæны тыххæй радзурдзæн Гуытъиаты Алинæ.
Тагъд рæстæгмæ хъуамæ Терчыбылгæрон аива йæ æддаг бакаст — зæгъынц проекты автортæ. Дзæуджыхъæуы центры фæзындзæнис нырыккон æмæ æнцонархайд фæлладуадзæн бынат. Йæ дæргъ уыдзæнис 4 мин километры æмæ ахæсдзæнис Красногвардейскийы хидæй Кировы хидмæ. Проектыл бакуыста архитекторты къорд Козырты Олег æмæ Алыккаты Русланы разамындæй.
Проект Терчы галиуварс адих кæндзæнис тематикон бынæттыл. Красногвардейскийы уынгæй Грибоедовы уынгмæ уаццаг скæндзысты велоспортæн. Уым сæ арæхстдзинадыл æфтаудзысты спортивон цардыуагыл хæст фæсивæд. Хæрзвадат горæты тыгъдад, сыгъдæг уæлдæф æмæ нырыккон технологиты фæрцы зынгæ фæрогдæр кæндзысты Дзæуджыхъæуы транспортон магистралтæ.
Терчыбылгæрон авторты хъуыдымæ гæсгæ суыдзæнис горæты тыгъдады центр æмæ баиу кæндзæнис дыууæ былгæроны цæрджыты. Уыцы хæс сæххæст кæнынæн баххуыс кæндзысты ног хидтæ æмæ фистæгæйцæуæн фæндæгтæ. Зæгъæм, Грибоедовы уынджы хид бабæтдзæнис дыууæ былгæроны. Ноджыдæр ма иу хид фæзындзæнис Павленкойы æмæ Гæдиаты Секъайы уынгты тигъыл.
Плиты Иссæйы цыртдзæвæны раз фæз суыдзæнис ноджы аивдæр æмæ йын ратдзысты историон комулæфт. Хуссардæр бынат скæндзысты Ныхас, донмæ ныххизæны та сæвæрдзысты ирон чызг-кæсаджы декоративон скульптурæ. Уымæй уæлдай фæзындзæнис сывæллæттæн æмæ бинонтæн хъазæн æмæ фæлладуадзæн бынæттæ, тренажертæ, скейт-парк, гом эстрадæ æмæ амфитеатр. Стыр æргом аздахдзысты æдасдзинады фарстатæм.
Цæнгæт хидæй Кировы хидмæ территори та суыдзæнис интеллектуалон æмæ культурон ирхæфсæн бынат. Наукон библиотекæйæ фæлладуадзæн паркмæ фистæгæйцæуæн хид та суыдзæнис Зонындзинæдты хид. Уым уыдзæнис цъæх тыргъ чингуыты дуканитимæ, кæсæн бынæттæ æмæ литературон кафе. Сæ рæстæг дзы рвитдзысты студенттæ. Терчыбылгæронæй фысымуат «Дзæуджыхъæумæ» бынат та снысан кодтой ирон литературæ æмæ культурæйы архайджытæн. Уыцы тыгъдад архитекторты хъуыдымæ гæсгæ баххæст кæндзæнис кавказаг музыкæйы центр. Цæгат Ирыстоны сæргълæууæг Сергей Меняйло бабар кодта, цæмæй бацæттæ кæной Доны станцæ æмæ Жуковскийы номыл парчы рацарæзты график. Куыстытæ райдайдзысты хæстæгдæр рæстæг. Архитекторты хъуыдымæ гæсгæ, тагъд рæстæг Терчыбылгæрон суыдзæнис доны раз фæлладуадзæн парк.
