2021-æм азы сентябрæй фæстæмæ Цæгат Ирыстоны Сæргълæууæг Сергей Меняйлойы хъæппæрисæй, æххæст кæнын райдыдтой регионалон проект «Кадетты кълæстæ»
2021-æм азы сентябрæй фæстæмæ Цæгат Ирыстоны Сæргълæууæг Сергей Меняйлойы хъæппæрисæй, æххæст кæнын райдыдтой регионалон проект «Кадетты кълæстæ». Проект ныридæгæн банымайæн ис æнтыстджыныл. Дзæуджыхъæуы фыццаг кадетты кълас байгом 4-æм гимназы. Бæлвырддæр радзурдзæн Томайты Батраз.
Кæд æмæ ацы фæсивæд иннæ лæппутимæ æмæ чызджытимæ иумæ ахуыр кæнынц, уæддæр сæрбæрзондæй хæссынц кадетты ном. Дзæуджыхъæуы 4-æм гимназ сси фыццаг ахуыргæнæндон, кадетты кълас кæм фæзынд, ахæм. Лæппутæ æмæ чызджытæ уроктæм фæцæуынц рæнхъытæй раст цæугæйæ.
Кадетты ном хæссы 5 «Б» кълас. Ис дзы 16 лæппуйы æмæ 16 чызджы. Иууылдæр, зæгъæн ис, æмæ сты æмдых. Чызджытæ дæр архайынц тхэквондойæ. Ацы къорд гимназы кусы ныр цалдæр азы.
Спортивон ахуыртæ цæуынц бындуронæй цалцæггонд спортивон залы. Ацы хъуыддаджы сын баххуыс кодта зындгонд спортсмен, бæхыл бадæг Тугъанты Владимир. Уый дæр раздæр уыд 4-æм гимназы ахуырдзау. Уымæй дарддæр кадеттæм рæхджы фæзындзæн 3 формæйы комплекты: быдырон, спортивон æмæ бæрæгбоны уæлæдарæс. Уымæн фæрæзтæ радих кодтой ахуырады министрадæй.
Нысантæм гæсгæ гимназы кадетты кълас арæзт цæудзæн алы аз дæр. Æдæппæтæй Цæгат Ирыстоны кадетты кълæсты ахуыр кæнынц 386 скъоладзауы. Регионалон проект «Кадетты кълæстæ», царды уадзынц республикæйы Сæргълæууæг Сергей Меняйлойы хъæппæрисæй, 2021-æм азы сентябры.
Цæгат Ирыстоны ныртæккæ кусынц 16 кадетты къласы. Проект ныридæгæн банымайæн ис æнтыстджыныл. Фидарæй зæгъæн ис, æмæ ацы кълæсты рæзгæ фæлтæр цы фæткыл сахуыр уой, уый сын фидæны уыдзæн царды сæйрагдæр бындур.
