Эпидемийы рæстæг йæ архайд кæд къуылымпытæ баййæфта, уæддæр йæ куыст нæ баурæдта
Дзæуджыхъæуы хистæр кары адæм боныгон сæ рæстæг кæм æрвитынц, уыцы центр æнхъæлмæ кæсы йæ лæггæдтæ исджытæм. Эпидемийы рæстæг йæ архайд кæд къуылымпытæ баййæфта, уæддæр йæ куыст нæ баурæдта. Цæуынц сæм 65 азæй къаддæр кæуыл цæуы, ахæмтæ. Центры разамынды ныхæстæм гæсгæ зæрдиагæй æнхъæлмæ кæсынц, сæ бон фенцондæр кæнын кæй фæнды, уыдонмæ. Сæ фадæттимæ базонгæ Сосранты Жаннæ, æмæ сæ раргом кæндзæн сымахæн дæр, нæ равдыстмæ кæсджытæ.
Доййаты Тамарæ тынг зæрдиагæй феххуыс кæны хистæр кары адæмы боныгон центрмæ æрбацæуджытæн. Фæлтæрдджын дохтыр æдзухдæр цæттæ у хъæугæ амынддзинæдтæ радтынмæ.
Центры разамынд рæстæгимæ æмдзу кæны. Æмæ архайы нырыккон медицинон аппараттæ амал кæныныл. Ардæм цы адæм цæуы, уыдоны ныхæстæм гæсгæ сæ пайда гуырысхойаг нæу. Доййаты Тамарæ ма куыд загъта, афтæмæй ма короновирусæй рынчын чи уыд, уыдоны æнæниздзинад фæхуыздæр кæнынæн пайдайаг ма кæй у массаж – уый дæр не вгъау кæнынц уагдонмæ цæуджытæн.
Центры цы лæггæдтæ кæнынц, уыдон сты 40 -мæ хæстæг. Алкæцыйыл дæр дзы дзуапп дæдты йæ дæсныйадмæ куыдфæндыйы цæстæй чи нæ кæсы, ахæм специалист.
Центрмæ æрбацæуын зын нæу. Лæвар дзы сæ рæстæг æрвитын у алы кары пенсиисджытæн, инвæлидтæн. Гаглойты Венера ардæм æрбацæуы, æрмæст процедурæтæ скæнынмæ нæ, фæлæ райдзаст æнкъарæнтæ райсынмæ.
Пандемийæмæ гæсгæ ныртæккæ центры арæзт нæ цæуынц хи ирхæфсæн мадзæлттæ, æндæр ардæм арæх æрбахонынц театралон къордтæ, æмæ артистты. Иу загъдæй Дзæуджыхъæуы хистæр кары адæм боныгон сæ рæстæг кæм æрвитынц, уыцы центр æнхъæлмæ кæсы йæ лæггæдтæ исджытæм. Эпидемийы рæстæг, сæ куыст кæд къуылымпытæ баййæфта, уæддæр йæ архайд нæ баурæдта. Цæуынц сæм 65- азæй къаддæр кæуыл цæуы, ахæмтæ. Æдæппæтæй та дзы бынат ис æртын адæймагæн. Центры разамынды ныхæстæм гæсгæ зæрдиагæй æнхъæлмæ кæсынц, сæ бон фенцондæр кæнын кæй фæнды уыдонмæ, стæй коронавирусæй рынчын чи уыд , уыдонæн баххуыс кæндзысты низы фæстиуджытæ аиуварс кæнынмæ.
