Национ наукон библиотекæйы кусджытæ бацæттæ кодтой дæсгай тематикон фæзы
Дзæуджыхъæуы ирд мадзалæй сбæрæг кодтой Советон Цæдисы равзæрды бон. Национ наукон библиотекæйы кусджытæ бацæттæ кодтой дæсгай тематикон фæзы. Уыдоны фæрцы нæ горæты цæрджытæн фадат уыд ивгъуыдмæ абалц кæнынæн. Фыццаджыдæр федтой советон фатерты æмæ æхсæнадон бынæтты интерьер. Бакастысты уыцы рæстæджы кинонывтæм æмæ мультфильмтæм. Уымæй дарддæр изæры азæлыдысты советон зарджытæ æмæ æмдзæвгæтæ. Бирæтæ рбацыдысты сæ рыгон бонтæ æрымысынмæ, стæй ма сæ кæстæртæн ивгъуыд дуджы тыххæй радзурынмæ. Сосранты Жаннæйæн ныхасы бар.
Алы тематикон фæз дæр йæхимæ лвасы дуджы рæстæджы хицæндзинæдтæй. Алцыдæр дзы дзурæг у Советон социалистон рæспубликæты цæдисыл. Æнусы размæ сæвзæрд ацы Паддзахад. Ксения Свиридова бæрæгбонмæ æрбацыд йæ бинонтимæ. Йæ ныхæстæм гæсгæ , канд уыцы рæстæг зæрдыл æрлæууын кæныны нысаниуæгимæ не рбацыд ардæм, фæлæ йæ фæнды сывæллæттæ йемæ базонгæ кæнын.
Бекъуырты Юрийæн ацы «Копейка» лæггад кæны 1986-æм азæй фæстæмæ, цæуы йыл æнусы æрдæгæй фылдæр. Ацы бонмæ бацæттæ кодта рагон машинæты равдыст. Советон Цæдисы рæстæджы коллекционертæн зæрдæрухсгæнæн бынат. Йæхæдæг ма ныры онг дæр æмбырд кæны уæды рæстæджы æхцатæ, ордентæ, майдантæ æмæ афтæ дарддæр.
Æдæппæтæй Национ наукон библиотекæ бацæттæ кодта 30 фæзы. Уыимæ канд равдыстытæ нæ, фæлæ ма дзы хъуыстысты æмдзæвгæтæ æмæ советон зарджытæ. Æвзонг барабантыл цæгъдджытæ та, æппæт æрбацæуджытæн радтой концертон программæ. Аивадон литературæйы залы та уыд «капсула времени». Алкæйы бон дæр уыд ныффыссын фидæны фæлтæртæм ныстуан æмæ йæ уым бавæрын. Фæндзай азы дæргъы уыдзæн библиотекæйы.
Раздæры комулæфт ма радта камерон кинозал. Æвдыстой дзы Советон кинонывтæ. Хæрæндоны дæр лæггад кодтой зæрдиагæй, йæ кусджытæ адæмы суазæг кодтой раздæры хъуыстгонд хæринæгтæй. Мадзал саразджыты хъуыдымæ гæсгæ йæ саразын æнцон хъуыддаг нæ уыд. Фæлæ кæцыдæр хæдзары дзаумæттæ сын балæвар кодтой горæты цæрджытæ, радтой сын ныфс. Сæдæгай адæймæгтæ сбæрæг кодтой, сæ зæрдæмæ хæстæг, сæ удты цæргæбонты бынат йæхицæн цы рæстæг ссардта, уый бæрæгбон. Кæд уæды Паддзахад нал ис, уæддæр йæ сгуыхтдзинæдтæ абон дæр сты хъару нырыккон Уæрæсейæн.
