Экспозицимæ хаст æрцыдысты Федор æмæ Сергей Федосеевты 35 куысты
Ивгъуыд æмæ абон чи бæтты, ахæм тæгтæ. Дзæуджыхъæуы историйы музейы байгом равдыст «Дзæуджыхъæу. Фæлтæрты бастдзинад Федосеевты хуызистыты аивады». Экспозицимæ хаст æрцыдысты Федор æмæ Сергей Федосеевты 35 куысты. Нымад сты Цæгат Ирыстоны сæйраг горæты хуызистыты азфысджытыл. Æмæ хуымæтæджы нæ. Горæты истори бахъахъхъæдтой сæ къамты. Ацы хуызистытæ конд сты советон æмæ нырыккон рæстæджыты. Адæймаг дзы æрмæст рагон уынгтæ нæ уыны, фæлæ йын фадат вæййы, ивгъуыд цардыуаг банкъарынæн, æмæ Дзæуджыхъæу куыд ивта, уый хи цæстæй фенынæн. Ацы равдыст культурон-бæстæзонæн проект у «Ирыстоны – фидæнмæ цæстæнгас»-ы кæронбæттæн мадзæлттæй иу. Равдысты фæлгæты ма ацыд нырыккон литературæимæ баст фембæлд дæр. Архайдтой дзы Цæгат æмæ Хуссар Ирыстоны, Белгороды æмæ Стъараполы крайы фысджытæ.
