Бакуыста йыл Уæрæсейы Æхсæнадон палатæ
Дзæуджыхъæуы йæ куыст райдыдта регионалон форум «Сообщество». Бакуыста йыл Уæрæсейы Æхсæнадон палатæ. Дыууæ боны программæйы сты алыхуызон секцитæ: «Æхсæнадон цæстдард», «Регионалон приоритеттæ», «Æнæкоммерцион сектор», «Туризм Цæгат Кавказы», «Социалон проекттæ аразын» стæй «Фæсивæдон политикæ». Фыццаг боны сæйрагдæр цау уыд – пленарон сесси «Общественный контроль – инициатива, участие, результат!». Йæ модераторы роль йæхиуыл сбарста Уæрæсейы Федерацийы æхсæнадон палатæйы секретарь Лидия Михеева. Æмбырды цы фæрстытæ лæвæрдтой, уыдон уыдысты æппæтæй актуалондæр. Афтæ, нæ республикæмæ цы федералон эксперттæ ссыдысты, уыдон рагагъоммæ базонгæ сты алы къабæзты уавæримæ. Æхсæнадон палатæйы уæнг, Æппæтуæрæсеон физкультурон-спортивон комплексы кусæг къорды эксперт Елена Истягина-Елисеева систа ахсджиаг фарста – Дзæуджыхъæуы кæй хъæуы, нырыккон домæнтæн дзуапп чи дæтдзæн, ахæм спортивон комплекс саразын.
Уымæй дарддæр ма форумы кусы Цæгат Кавказы федералон зылды æнтыстджындæр социалон проектты равдыст. Уырдæм сæ хуыздæр социалон практикæтæ бацæттæ кодтой æнæкоммерцион организацитæ. Семæ зæрдиагæй базонгæ Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло.