Уый тыххæй республикæмæ Мæскуыйæ ссыд зындгонд паддзахадон академион театры труппæ
Æрмæст Цæгат Ирыстонæн нæ, фæлæ æнæхъæн бæстæйæн дæр ахсджиаг культурон цау. Дзæуджыхъæуы кадджын уавæры байгом Евгений Вахтанговы хæдзар. Уый тыххæй республикæмæ Мæскуыйæ ссыд зындгонд паддзахадон академион театры труппæ. Абонæй фæстæмæ музейы экспозициимæ базонгæ уæвыны фадат уыдзæн се *ппæтæн дæр. 3-æм майы та байгом уыдзæн арт-кафе. Аивадуарзджыты размæ моноспектакль «Пиковая Дама» рахæсдзæн Уæрæсейы Федерацийы адæмон артист Евгений Князев. Бæлвырддæр хабæрттæ радзурдзæн.
Цæгат Ирыстон фыццаг хатт суазæг кодта уыйбæрц ирд театралон стъалыйы. Уый у æцæг историон цау. Дзæуджыхъæуы кадджын уавæры байгом кодтой Евгений Вахтанговы хæдзар. Ныр ам, горæты центры, фидæны режиссер-реформатор кæм райгуырд æмæ 20 азы кæм фæцард, ис ног культурон тыгъдад музеимæ, арт-кафеимæ æмæ, æнæмæнг, сценæимæ.
Цæмæй Дзæуджыхъæу ацы цау йæ зæрдыл бадара, уый тыххæй алцыдæр конд æрцыд.
Зæрдæбын арфæты фæстæ, се ппæт дæр систы æвдисæн æхсызгон хабарæн.
Æмæ кæд къæвдабон ракодта, уæддæр уый рагæй кæмæ æнхъæлмæ кастысты, уыцы бæрæгбон нæ фехæлдта. Мадзаларазджыты хъуыдымæ гæсгæ, ацы цауы ирддæр хæйттæй иу хъуамæ суыдаид сирены талатæ ныссадзын – уыд Евгений Вахтанговы уарзондæр дидинæг. Кирилл Крок йæхæдæг байуæрста кусæг æрмкъухтæ Вахтанговы номыл паддзахадон академион театры труппæйæн. Уыйбæрц адæмон артистты ма ахæм уавæрты кæм уыдаид фенын. Сергей Маковецкий ныридæгæн мæт кæны йæ фæллойы хатдзæгтыл.
Республикæйы сæргълæууæджы æмæ кадджын уазджыты къухты сырх ленты гæппæлтæ. Вахтанговы хæдзар сæмбæлд фыццаг уазджытыл. Се хсæн номдзыд режиссеры фæдон Дина Вахтангова. Ацы цаумæ 50 азæй фылдæр æнхъæлмæ кастысты.
Генийы æнæмæлгæ сурæт алы экспонаты дæр. Ам сты мæскуыйаг театры музейæ æрмæджытæ æмæ архивон документтæ, реставрацигонд хуызистытæ, фыстытæ, мысинæгтæ. Реконструкци райдыдта 2 азы размæ. Алы квадратон метры дæр – сæдæгай специалистты фæллой. 6 равдыстадон залы сног кодтой Вахтанговты бинонты цардыуаг. Интерьертæ баххæст кодтой бинонты реликвитæй.
Уыцы дуджы традицитæ хуыздæр банкъарæн ис ног технологиты фæрцы. Иу бавнæлдæй базонæн ис бинонты биографийæ цымыдисаг хабæрттæ æмæ легендарон спектакльты бæлвырддзинæдтæ. Вахтанговы фæндыд, цæмæй йæ «Принцесса Турандот» фенгæйæ, дуне бамбара,– ахæм уæззау рæстæг ахæм пьесæ цы бæстæ сæвæрдта, уый æнæмæнг йæ къæхтыл слæудзæн. Уый тыххæй йе сфæлдыстадон фæллойты фыссы Биазырты Валентинæ. Зындгонд спектаклæн ам æнæхъæн зал радих кодтой.
Алы дзаума дæр ам сусæг кæны диссаджы истори. Иутæ дзы рæстæгимæ раргом вæййынц. Ай та у 19-æм æнусы кæроны рояль. Ахуыр ыл кодта маэстро Юрий Темирканов, фæстæдæр куыд рабæрæг, афтæмæй фыццаг инструмент уыд Вахтанговты бинонты.
Ацы стыр проект, Вахтанговы номыл театр хайгай кæй сног кодта, уый сси номдзыд труппæйы сезоны ахсджиагдæр премьерæ.
Вахтанговы райгуырæн хæдзар сног кæныны уынаффæ хаст æрцыд 2015-æм азы. Уæд кæлæддзаг бæстыхайы уырыссаг театры генийы тыххæй дзырдта æрмæст разуындыл конд мемориалон табличкæ. Цалцæггæнæн-арæзтадон куыстыты сметæйы аргъ – 200 милуан сомы. Театралон къордæн ахсджиаг уыд, ацы стыр проектмæ аивадуарзджыты æргом раздахын.
Бæрæгбон иу бонæй нæ ахицæн. 3-æм майы Вахтанговы хæдзары арт-кафе сæмбæлдзæн фыццаг аивадуарзджытыл. Евгений Князев сæ размæ рахæсдзæн моноспектакль «Пиковая Дама». Чысыл декорацитæ, мæнгрухс, бирæ рольтæ æмæ иу актер. Афтæмæй адæймаджы тыххæй истори рауад æддæрæстæг. Раст ацы хæдзары æмæ Евгений Вахтанговы генийы æрыздæхты фæндаджы историйы хуызæн.
