7 мин квадратон метры фæзуаты æрбынат кодтой нырыккон тренажерты залтæ, къордтæй кусыны зонæтæ æмæ егъау фæлладуадзæн комплекс
Дзæуджыхъæуы кадджын уавæры байгом кодтой бинонты физкультурон-дзæбæхгæнæн комплекс «Физикон». 7 мин квадратон метры фæзуаты æрбынат кодтой нырыккон тренажерты залтæ, къордтæй кусыны зонæтæ æмæ егъау фæлладуадзæн комплекс. Абарæн кæмæн нæй, ахæм объект горæты цæрджытæн сарæзта æппæт нырыккон уавæртæ тренировкæтæ кæнынæн, æмæ хи дзæбæх кæнынæн. Проект царды рауагътой, федералон программæ «Бизнес-спринт» æххæст кæнгæйæ. Хабæрттæ бæстондæр радзурдзæн Чехойты Фатимæ.
Бæрæгбонау парахатæй Дзæуджыхъæуы байгом кодтой бинонты физкультурон-дзæбæхгæнæн комплекс «Физикон». Кадджын уазджыты *хсæн – Уæрæсейы спорты министры хæдивæг Мгер Гандилян, Цæгат Ирыстоны Хицауады сæрдар Дзанайты Барис, Республикæйы физкультурæ æмæ спорты министр Фрайты Сослан, уæгъдибар хъæбысхæсты чемпионтæ. Уыдонæн фенын кодтой комплексы фадæттæ. Бацæуæнæй дæр зыны объекты хъомыс. Йæ фæзуат ахсы 7 мин квадратон метры бæрц. Уый у нырыккон тыгъдад, алы метр дæр конд у адæмы хæрзвадатæн.
Комплекс арæзт у, æппæты домаг спортсментæ æмæ, фæлладуадзыны активон хуызтæ чи равзары, уыцы адæм разыйæ кæмæй баззайой, ахæм фæзтæй. Спортивон хай – тренажерты егъау зал нырыккон ифтонггæрзтимæ, райдзаст агъуыстытæ иумæйаг программæтты архайынæн. Сарæзтой дзы уырыссаг хи найæн бынат, финаг саунæ Гималайæ ласт цæххимæ, æртæ – гом æмæ æхгæд бассейны, уыдонимæ – сывæллæттæн дæр. Комплексы сæйраг нысаниуæг у – бинонтæн аразын фадæттæ спортæй архайынæн æмæ дзæбæх кæнынæн. Ардæм æрбацæуæн ис бинонтæн æмæ рæстæг пайдаимæ арвитын. Республикæйы Хицауады сæрдар куыд фæбæрæг кодта, афтæмæй Ирыстон алы рæстæг дæр уыдис чемпионты куырдадз, республикæйæн ис хъæздыг спортивон истори. Дзанайты Барисы ныхæстæм гæсгæ, ахæм бæрзонд технологон объекты фæзынд ахсджиаг у нæ регионæн. Фадат дæтты алы кары адæмæн спорт æмæ æнæниз цардыуагмæ æмхиц кæнын.
Комплекс арæзт æрцыд паддзахады æмæ хицæн адæмы æнтыстджын æмгуыстады руаджы. Проект æххæстгонд æрцыд федералон программæ «Бизнес-спринт Я выбираю спорт» -мæ гæсгæ. Бадзырд фыст æрцыд Цæгат Ирыстоны Хицауад æмæ инвестортимæ. Ахæм æмгуыстад фадат дæтты ахсджиаг социалон объекттæ аразгæйæ, нырыккон технологитæй æмæ хицæн адæмы ивестицитæй паддзахады разамындæй пайда кæнынæн.
Специалистты хъуыдымæ гæсгæ, ахæм комплекс Цæгат Кавказы федералон зылды иу регионы дæр нæй. Объекты руаджы дзæбæхгæнæны лæггæдты къабаз райста ног, хæрзхъæд хуыз. Дунеон æмвæзад кæмæн ис, уыцы нырыккон инфраструктурæйæ пайдагæнæн ис республикæйы алы цæрæгæн дæр.
