Ссардтой дзы Сергей Кировы номыл Дзæуджыхъæуы уæлдæр командон æфсæддон училищайы курсантты æмæ офицерты хъæбатырдзинад
Цæмæй рох ма уой. Дзæуджыхъæуы кадджын уавæры байгом кодтой номарæн фæйнæг. Ссардтой дзы Сергей Кировы номыл Дзæуджыхъæуы уæлдæр командон æфсæддон училищайы курсантты æмæ офицерты хъæбатырдзинад. Фæйнæг æрцауыгътой Кировон – Курсантты номыл уынджы хæдзары къулыл. Фыдыбæстæ хъахъæнджыты ном ссарыны мадзалы архайдтой национ гвардийы Федералон службæйы æфсæдты директоры хæдивæг – Уæрæсейы национ гвардийы æфсæдты сæйраг командæгæнæг, инæлар – булкъон Виктор Стригунов, æфсады инæлар Анатолий Куликов, ветерантæ æмæ ахуыргæнæндоны алы азты рауагъдонтæ. Кадджын мадзалы уыд Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло, Дзæуджыхъæуы разамынды минæвæрттæ, стæй алыхуызон ведомствæты æмæ æхсæнадон организациты минæвæрттæ.
Мемориалон фæйнæг æвæрд æрцыд æхсæнадон организаци «Кировцы»-йы уæнгты хъæппæрисæй. Йæ автор та у, скульптор-монументалист, Уæрæсейы нывгæнджыты цæдисы уæнг, Цæгат Ирыстоны адæмон нывгæнæг Ходы Николай. Мемориалыл дидинджытæ сæвæрæны фæстæ, æппæт уазджытæ дæр ацыдысты мемориал «Барбашовы фæз»-мæ. Уым мидхъуыддæгты министрады кусджыты хъæппæрисæй æвдыст æрцыд документалон киноныв училищæйы æмæ йæ рауагъдонты тыххæй. Уыимæ дзы адæмы размæ хаст æрцыдысты уникалон кадртæ хæсты рæстæджы Дзæуджыхъæуæй. Уыцы уæззау рæстæг 138 «кироваг» хæстонæн лæвæрд æрцыд паддзахадон хæрзиуджитæ. Авдæн дзы саккаг кодтой Советон Цæдисы хъæбатæры ном, фæстæдæр та ма 13 систы Уæрæсейы хъæбатыры ном хæсджытæ. Уазджытæн ма мемориалыл скодтой экскурси.
