Кинолентæйы сюжет ист у цардæй
Дзæуджыхъæуы кинотеатртæй иуы равдыстой ног киноныв «Яма». Кинолентæйы сюжет ист у цардæй. Бæлвырддæр та – нæ бæстæйы ивгъуыд æнусы 90-æм азты цаутæй. Дисы фтауæг истори афтæ парахат нæ уыди, фæлæ æрыгон режиссер Таматы Ассаны фæрцы, зæгъæн ис, æмæ райста ног хуыз. Киноныв дзурæг у хæлардзинадыл, ныфс дæттыныл æмæ цыфæнды зындзинæдты сæрты ахизыны гæнæнтыл. Премьерæйы тыххæй бæстондæр æрдзурдзæн Касаты Наирæ.
Райдайгæ режиссер Таматы Ассаны кинонывы æвдыст цæуынц 90-æм азтæ. Сæйраг хъайтар 15 аздзыд Батраз бахауд фыдгæнджыты уацары. Афæдзы рдæг ис арф дзыхъхъы. Рацыди мæйтæ, æмæ ма уыцы уавæры бахауд ноджыдæр иу уацайраг. Иумæ бирæ фæхъуыды кодтой æмæ сфæнд кодтой лагерæй алидзын.
Киноныв ист у æцæг цауты бындурыл. Уацарæй алидзын кæмæн бантыст, æмæ ма уыимæ, æгасæй баззайгæйæ, уыцы дыууæ æвзонг лæппуйы истори адæмæн тынг зонгæ нæ уыди. Таматы Ассаны киноныв «Яма» у царды æцæгдзинæдтыл, хъæбатырдзинадыл æмæ хæлардзинадыл дзурæг.
Съемкæтæ цыдысты хæххон хъæу Къæмунтæйы. Хъæбатыр нæлгоймаджы ирд сурæттæ экранмæ рахастой Джабиты Георгий, Музаты Георгий, Биазырты Валерий. Ацы актертæ кæд профессионалтæ не сты, уæддæр сæ размæ вæрд хæс сæххæст кодтой иттæг хорз. Стæй ма райстой стыр фæлтæрддзинад дæр. Съемкæтæ цыдысты æртæ мæйы.
Ацы бонты киноныв рахастой аивадуарзджыты размæ. Интернетры та фæзындзæн афæдзы кæронмæ.
