Ныртæккæ лæггкад кæны 432 бирæфатерон хæдзарæн
Дзæуджыхъæуы кусын райдыдта фыццаг муниципалон разамынддæттæг компани “Домоуправление”. Ныртæккæ лæггкад кæны 432 бирæфатерон хæдзарæн. Специалистты хъуыдымæ гæсгæ бæстыхæйтты инженерон-техникон уавæр 80 проценты бæрц ис æвзæр уавæры. 4 мæймæ уал баивтой 35 хæдзары кусæнгæрзтæ. Аварион бригадтæ та кусынц карздæр фæткмæ гæсгæ. Хъайтмазты Дзерассæ радзурдзæн бæлвырддæр.
Хъарм хæдзармæ къуылымпытимæ хæццæ кæны, доны хæтæлтæ тæдзынц. Ацы лыггæнинаг фарстатимæ Темырты æфсымæрты уынджы 70-йæм хæдзары фыццæгæм корпусы цæрджытæ сæмбæлдысты 20 азы размæ. Чихауиты Людмилæ куыд зæгъы, афтæмæй азæй-азмæ хæтæлты уавæр æвзæрдæр кодта. Цæрæн бæстыхай бирæ хæттыты лæвæрд цыд алыхуызон разамынддæттæг компанитæм. Цæрджытæ сæм сæ курдиæттимæ иу æмæ дыууæ хатты нæ сидтысты, фæлæ уавæр нæ ивта. Æмæ ныр бирæ азты фæстæ куыстытæ райдыдтой. Хæдзарæн абон лæггад кæны фыццаг муниципалон разамынддæттæг компани «Домоуправление».
Куыстытæ ам райдыдтой 2 къуырийы размæ. Хъарм ныр æххæстæй хæццæ кæны хæдзармæ, баззад ма хицæн хæтæлты куыст банывыл кæнын. Ног хæтæлтæ сты полипропиленæй конд. Фылдæр фæлæггад кæндзысты. Сæ гарантийы æмгъуыд у – æппынкъаддæр 50 азы. Объекты фæллой кæны 2 бригады. Æххæстгонд куыстытæн муниципалон компани цæрджытæй æхца нæ исы. Хъæугæ æрмæджытæ æлхæд цæуынц, техникон лæггад кæнынæн цы фиддонтæ æмбырд кæнынц, уыдоны хыгъдæй.
Муниципалон разамынддæттæг компани лæггад кæны 432 бирæфатерон хæдзарæн. Бæстыхæйтты 80 проценты инженерон-техникон уавæр у тынг уæззау, зæгъынц специалисттæ. 4 мæйы куыстмæ компанийæн бантыст уазал æмæ тæвд доны, стæй канализацион хæтæлтæ баивын 35 хæдзары. Уымæй уæлдай ма архайы цæрæнуæтты сæртæ æмæ лифттæ ног кæныныл.
Ныртæккæ разамынддæттæг компанийы аварион бригадтæ кусынц уæлæмхасæн æмæ сæрмагонд фæткмæ гæсгæ. Куыстуатмæ бадзурæн ис телефонæй. Йæ номыр 20-00-24.
