Горæты сын нæй сæрмагонд фæзтæ
Дзæуджыхъæуы куыйты чи дары, уыдон зындзинæдтæ æййафынц сæ цæрæгойты тезгъо кæнынмæ кæдæм ракæной, ахæм бынæттæ кæй нæй, уыимæ. Горæты сын нæй сæрмагонд фæзтæ. Куыдзæн йæ бон атезгъо кæнын кæм у, иунæг ахæм бынат у Металлургты парк. Фæлæ ацы къохы быру нæй æмæ у базилинаг. Уый æдас нæу цæрæгойтæн æмæ сæ хицæуттæн дæр. Прокуратурæ ацы фарста сбæлвырд кодта. Уавæры тыххæй радзурдзæн Хъайтмазты Дзерассæ.
Валентина Торопмæ ис 5 куыдзы, се ппæт дæр карджын сты. Йæ хæлар куы фæзиан, уый фæстæ йын Валентинæ йæ куыйты йæхимæ райста, йæ бон сæ не сси уынджы ныууадзын. Семæ кæм тезгъо кæна, уый ис – цæры Металлургты парчы цур. Фæлæ ахæм гæнæн цыппаркъахыгты се ппæт хицæуттæн нæй .
Куыйты тезгъо кæнынæн сæрмагонд бынат кæй нæй, уый у риссаг фарста. Ахæм уавæрæй тыхсынц цæрæгойты хицæуттæ, стæй куыйтæ кæмæ нæй, уыдон дæр. Рауайы быцæутæ.
Куыйтæ дарыны дзæуджыхъæуккаг клубæн ис хъæздыг истори. Йæ архайджытæ уæлахиз кодтой стыр ерысты, æнтыстджытæй службæ кодтой арæнхъахъхъæнæн æмæ мидæфсадты. Ацы хъуыддаджы сын æххуыс кодта, цыппаркъахыгты дарыны фæлтæрддзинад. Ныртæккæ клуб дарддæр йæ куыст æххæст кæны. Дрессурæйы зонындзинæдтæ амонынæй фæстæмæ ма инструктортæ кæсынц лекцитæ зоопсихологийæ. 6 мæйы онг кæуыл цæуы, уыцы куыйтимæ ахуыртæ сты лæвар. Фæлæ æрмæст ацы хъуыддаг æххæст кæнынæн бынат нæй.
Металлургты галуаны парчы кæрон цы фæз ис, уырдæм сæ цæрæгойты тезгъо кæнынмæ æрбакæнынц æппæт районы куыйты хицæуттæ. Ам архайынц клубы уæнгтæ дæр, кæд дзы æмбæлгæ уавæртæ нæй, уæддæр.
Уæдмæ та уал Дзæуджыхъæуы Ирыстойнаг районы прокуратурæ сбæлвырд кодта, цæрæгойтæ дарыны тыххæй закъонады домæнтæ куыд æххæстгонд цæуынц, уый. Сæрмагондæй та, тезгъогæнæн фæзуаттæ ис æви нæй, уыцы хъуыддаг.
Тæрхондоны прокуратурæйы домæнтимæ сразы сты. Уым рахастой уынаффæ, цæмæй Дзæуджыхъæуы администраци афæдзы дæргъы снысан кæна, хæдзарон цæрæгойты тезгъо кæнынæн фæзтæ.
