Йæ автор у Золойты Руслан. Фенæн дзы ис нывгæнджыты 80 куысты
Дзæуджыхъæуы национ музейы байгом равдыст «Хештег». Йæ автор у Золойты Руслан. Фенæн дзы ис нывгæнджыты 80 куысты. Золойты Руслан сарæзта, политикæ, психологи, культурæ, литературæ æмæ æндæр темæтыл ныхас кæм цæуа, ахæм тыгъдад. Бирæ куыстыты нывгæнджытæ равдыстой ивгъуыд æмæ нырыккон рæстæг, традицитæ æмæ ногдзинæдтæ. Равдысты номы баиу сты дыууæ ахсджиаг хъуыддаджы: хештег, куыд нырыккон символ æмæ ирон «хæстæг», ома хион. Бæлвырддæр радзурдзæн Чехойты Фатимæ.
Нывты арф хъуыды тагъд нæ раргом вæййы. Алы куыст бамбарынæн дæр хъæуы рæстæг æмæ лæмбынæг æркаст. Золойты Русланы равдыст – уымæн дæнцæг. Ныв «Иронау дзур» – ы нысан у мадæлон æвзагимæ баст. Нывгонд ыл ис йæ хъæбулы хъæбултæ йæ кæй не *мбарныц, ууыл чи сагъæс кæны, ахæм зæронд лæг.
Нывгæнджыты куыстытæн сæ хъуыды раргом кæнын цымыдисаг у. Фæлæ авторæй хуыздæр уый никæмæн рауайдзæн. Алы куыстæн дæр ис йæхи кью-ар код. Смартфон æм хæстæг бахæсгæйæ, байхъусæн ис аудио фыстæгмæ, кæцыйы автор дзуры, йæ куысты цы хъуыды бавæрдта, ууыл. Золойты Руслан йæхи дæсны нывгæнæгыл нæ нымайы. Кусы профессионалон нывгæнджытимæ. Равдысты фенæн ис Уалыты Тинæ, Сохъуырты Эльвирæ, Хъайтмазты Тигран æмæ Къизилты Еленæимæ иумæ цы куыстытæ сарæзта, уыдон.
Равдыст «Хештегы» фенæн ис 80 куысты. Золойты Руслан сарæзта политикæ, культурæ, психологи, литературæ æмæ æндæр цымыдисаг темæтыл кæм дзурынц, ахæм тыгъдад. Нывты баиу сты ивгъуыд æмæ нырыккон цард, традицитæ æмæ ногдзинæдтæ.
Золойты Руслан спайда кодта алыхуызон аивадон фæрæзтæй – нывтæй, инсталляцитæй, медиа-хъусынгæнинæгтæй. Уыдоны руаджы адæмæн фадат ис алыхуызон хъуыдытæ æмæ цæстæнгас кæм баиу вæййынц, ахæм иумæйаг информацион тыгъдады хай суæвынæн. Зæгъæм дунейы низты тыххæй хъуыдытæ бамбарынæн сарæзта инстолляци: сыгъдæг четæн æмæ урс хуыссæны цъæрттæ æппæтæй хуыздæр авдисынц фарстайы ахсджиагдзинад.
Равдыст «Хештег» байгом кæныны мадзалмæ æрбацыдысты сæдæ адæймагæй фылдæр. Сæ цæстæнгасæй бæрæг уыд, сæ рæстæг дзæгъæлы кæй нæ арвыстой, уый.
Проект баиу кодта нырыккон символ «Хештег» æмæ ирон Хæстæг, ома хион. Йæ сæйраг хæс уыд, адæмы зæрдыл æрлæууын кæнын – аивад фидæн бамбарыны ахсджиаг фæрæз кæй у, уый.
