Æрмæст фарон процедурæ скодтой мин куыдзæй фылдæрæн
Дзæуджыхъæуы питомникы ахадгæйæ цæуы куыйты стерилизаци кæныны куыст. Æрмæст фарон процедурæ скодтой мин куыдзæй фылдæрæн. Куыстуаты зæгъынц, афтæмæй Дзæуджыхъæуы уынгты дзæгъæл цæрæгойты нымæц къаддæр кæндзæн. Риссаг фарста куыд лыггонд цæуы, уый тыххæй нæ дарддæры æрмæг.
Дзæуджыхъæуы питомникы ног адæм куы фæзыны, уæд сыл куыйтæ æхсызгонæй бацин кæнынц. Уыимæ ацы бынаты уыйбæрц дзæгъæл куыйтæ кæй ис, уый у, адæймаджы æбæрнон ахастдзинады хатдзæг. Ацы куыдзы кусджытæ питомникмæ хæстæг ссардтой æнгом баст голладжы. Йæ фарсмæ къоппы та уыдысты къæбылатæ. Аирвæзын кæнын сæ бантыст, фæлæ иуæй-иу адæмы карздзинад дисы æфтауы. Бирæ куыйтæ, бæрæг у, алы мыггæгтæй хæццæтуг сты. Ацы къæбылатæ фæзындысты кæнæ сæхæдæг чи тезгъо кодта, кæнæ æнæ хицæуттæй чи баззад, ахæм куыйтæй. Æмæ уым цæрæгойты аххос нæй – ацы хъуыддаджы бæрнон сты адæм.
Иу куыдзæн, гæнæн ис, æмæ 10 къæбылайы онг райгуыра. Уый хынцгæйæ, питомникы мин стерилизацийы фæрцы горæты уынгты нæ фæзындзæн 10 мин ног æнæхæдзар куыдзы. Дзæгъæл цæрæгойты нымæц ма фылдæр кæныны ахæм хæларзæрдæ хуыз у питомникы æнтыстджын куысты хатдзæг.
Цæрæгойтæ æнæ хицæуттæй кæй тезгъо кæнынц, уый ма у æнæхæдзар куыйтæ кæй фæзыны, уый иу аххосаг. Гæнæн ис, æмæ фесæфой, фæдзæгъæл уой, стæй ма афтæмæй сæ нымæц зынгæ фылдæр кæны.
Федералон закъонмæ гæсгæ ныридæгæн æмбæлы ивар, цæрæгойтæ сæрмагонд бынæттæй дарддæр æнæ хицæуттæй куы тезгъо кæной, уый тыххæй. Нырма дзы парахатæй нæ пайда кæнынц, фæлæ уый рæстæгмæ. Цæрæгойтимæ бæрнон ахаст куы уа, уæд уынгты æдасдæр уыдзæн.
Фарон ног хицæуттæ фæзынд 209 куыдзæн. Сæ хыгъды къæбылатæ дæр æмæ стыр куыйтæ дæр. Уый у Владпитомникы æмæ волонтерты иумæйаг куысты хатдзæг. Ацы урс къæбыла дæр ссардта ног хицауы. Райста йæ не сфæлдыстадон къорды шофыр. Уæвгæ, ардыгæй æнæ ног цыппаркъахыг æмбалæй ацæуын зын у. Уымæ гæсгæ питомникы дуæрттæ уазджытæн кæддæриддæр гом вæййынц. Æмæ ахсджиаг у хъуыды кæнын, кæй сæрмахуыр кодтай, ууыл дзаупп дæттын хъæуы.
