Сæ зонындзинæдтæ дзы бафæлварынц мингай скъоладзаутæ
Дзæуджыхъæуы райдыдта Æппæтуæрæсеон ахуырадон олимпиадæты муниципалон къæпхæн. Мадзал сси æрвылазон. Сæ зонындзинæдтæ дзы бафæлварынц мингай скъоладзаутæ. Олимпиадæ сарæзæг у Дзæуджыхъæуы ахуырады управлени. Скъоладзаутæ сæ кармæ гæсгæ ерыс кæнынц 19 дисциплинæйæ. Бæрнон жюрийы уæнгтæ – алыхуызон предмæтты фæлтæрдджындæр ахуыргæнджытæ æмæ ахуырады управленийы минæвæрттæ, лæмбынæг цæст фæдарынц зонадон ерысты цыдмæ æмæ фæткæвæрдмæ. Кæронбæттæн тæрхон тæ рахæссынц Дзæуджыхъæуы предметон методикон иугæндтæ. Ацы зонадон олимпиадæтæн ис стыр нысаниуæг. Сæ уæлахиздзаутæн фадат вæййы Уæрæсейы хуыздæр уæлдæр ахуыргæнæндæттæм æнцондæр уавæртæм гæсгæ бахауынæн. Уый хынцгæйæ, скъоладзаутæ сæхи уæлдай æхсызгондæрæй фæцæттæ кæнынц. Азæй-азмæ олимпиадæйы архайджыты нымæц фылдæрæй фылдæр кæны. Бирæтæ фæлварынц сæхи цалдæргай предметтæй, уыимæ райсынц иттæг хорз бæрæггæнæтæ. Зæрдиагдæрæй фæархайынц математикæ, уырысаг æвзаг, физикæ, биологи æмæ æхсæнадзонынадæй ерысты. Олимпиадæйы муниципалон къæпхæн фæуыдзæн 29-æм ноябры. Кæронбæттæн ерыстæ та уыдзысты фæсарæйнаг æвзæгтæй.
