Фестивалы фæлгæты равдыстой фыццаг спектакль «Все утопить»
Афæдзы дæргъы цы цаумæ æнхъæлмæ кастысты, уый. Дзæуджыхъæуы райдыдта 2-аг æппæтуæрæсеон театралон фестиваль «Вахтангов. Путь домой». Байгом, физкультурæмæ æмхиц адæмы цыдæй æмæ уæрæх театралон программæйæ. Бæрæгбоны цыд райдыдта Сæрибардзинады фæзæй Сабырдзинады проспектыл Евгений Вахтанговы номыл уырыссаг театры онг æмæ раздæхт фæстæмæ. Дарæс æмæ декорацитæ сарæзтой волонтертæ нывгæнджытимæ. Фестивалы фæлгæты равдыстой фыццаг спектакль «Все утопить». Бæстондæр радзурдзæн Чехойты Фатимæ.
Театралон мадзал райдыдта физкультурæйæ. Дзæуджыхъæуы астæу арæзт æрцыд бæрæгбоны цыд. Ацы аз баст уыд физкультурæйы темæимæ, уыд 20-æм æнусы 30-æм азты арæзт театралон цыд æнгæс. Спортсментæ уыцы рæстæджы дарæсы, артисттæ, музыканттæ æмæ егъау куклатæ. Æппæтуæрæсеон фестиваль баиу кодта дæсгай бынæттон кафджыты æмæ спортивон къордттæ.
Нырыккон кафты ансамблы фарсмæ айкидойы скъолайы хъомылгæнджытæ. Баиу сæ кодта аивад, зæгъынц архайджытæ. Евгений Вахтангов куыд уарзта, афтæ.
Бæрæгбоны цыд райдыдта Сæрибардзинады фæзы, йæ фæндаг акодта Сабырдзинады проспектыл Евгений Вахтанговы номыл уырыссаг театры онг æмæ раздæхт фæстæмæ. Театруарзджытæ сæм кастысты, проспекты фæйнæфарс лæугæйæ. Иутæ æмдзæгъд кодтой, иннæтæ та къамтæ истой. Ирд сурæттæ, музыкæйы зæлтæ, адæмы мидбылхудт. Бæрæгбоны цыд равдыста, театралон гений йæ райгуырæн зæххмæ кæй сыздæх, уый.
Театралон марафоны сæргъы, фарон куыд, афтæ – Кирилл Крок. Йæ ныхæстæм гæсгæ, ацы аз Дзæуджыхъæумæ ссыдысты уынгты театртæ Мæскуыйæ, Санкт-Петербургæй æмæ Воронежæй, стæй цирчы къордтæ. Театры коллектив алы аз дæр республикæйæн æххуыс кæны, цæмæй Дзæуджыхъæуыл Цæгат Кавказы культурæйы сæйраг горæты ном ныффидар уа, зæгъы Кирилл Крок.
Алы персонаж дæр рацыд Картонийæ. Уый хуымæтæг æрмадз нæу. Театралон диссæгтæ кæм гуырынц, ахæм бынат у. Бæрæгбоны цыдæн дарæс æмæ декорацитæ бацæттæ кодтой бархионтæ нывгæнджытимæ. Дыккаг фестиваль «Вахтангов. Путь домой» ныр ныр райдыдта, фæлæ бæлвырд у : Вахтангов сыздæхт йæ райгуырæн зæххмæ. Йемæ та – йæ фæдзæхст: нæй спектакль, нæй бæрæгбон. Сæрибардзинады фæзы сæ дæсныйад равдыстой уынджы театртæ дæр. Сæ курдиатæн сын стыр аргъ скодтой ирыстойнаг театруарзджытæ.
Æппæтуæрæсеон фестиваль «Вахтангов. Путь домой» ахæсдзæн къуыри. Республикæйы цæрджытæн æмæ уазджытæн бацæттæ кодтой театралон постановкæтæ, ахуырадон программæ. Фестиваль фæуыдзæн 13-æм июлы бæрæгбоны стыр концертæй.
