Бынаты æрæмбырд сты Цæгат Кавказы федералон зылды æппæт регионтæй 300 адæймаджы онг
Дзæуджыхъæуы райдыдта регионты хсæн фыццаг медиафорум «PRO Кавказ». Арæзт цæуы Цæгат Ирыстоны Сæргълæууæг Сергей Меняйлойы хъæппæрисæй. Форум байгом кæныны кадджын мадзалы бацархайдта Хицауады Сæрдар Дзанайты Барис. Бынаты æрæмбырд сты Цæгат Кавказы федералон зылды æппæт регионтæй 300 адæймаджы онг. Се хсæн дзыллон информацийы фæрæзты минæвæрттæ, блогертæ, паддзахадон æмæ коммерцион организациты пресс-службæты специалисттæ, медиакоммуникациты къабазы эксперттæ, хицаудзинады оргæнты минæвæрттæ, æхсæнадон, æнæкоммерцион æмæ бизнес-æхæснады уæнгтæ.
Форумы фæзы равæрдтой цæгаткавказаг регионты дзыллон информацийы мыхуыры фæрæзтæ. Уымæй дарддæр уазджытæн презентаци скодтой Цæгат æмæ Хуссар Ирыстоны иумæйаг стендæн. Ахсджиаг уый у, æмæ форум кæй æрбангом кодта куыд Цæгат Кавказы медиа-æхсæнад, афтæ федералон æмвæзады фæлтæрдджын экспертты дæр. Форумы архайджытæн ма раарфæ кодтой нæ республикæйы мыхуыры фæрæзты æмæ дзыллон коммуникациты Комитеты сæрдар Фидараты Юрий, стæй журналистты Цæдисы цæгатирыстойнаг хайады сæрдар Хъуысаты Тимур. Фыццаг медиафорум «PRO Кавказ» Дзæуджыхъæуы цæуы дыууæ боны 29-30-æм июны. Кадджын уазджыты хсæн ма зындгонд уæрæсейаг эксперттæ: тележурналист æмæ амонæг, Паддзахадон Думæйы депутат Евгений Попов, политолог, æппæтадæмон хъуыддæгты фæдыл Уæрæсейаг советы эксперт Сергей Маркедонов, телерадиохъусынады Национ ассоциацийы директор Александр Широких, æппæтадæмон мультимедион проекты сæйраг редактор Всеволод Пуля, Уæрæсейы журналистты Цæдисы секретарь Юлия Загитова, æмæ æндæр зындгонд специалисттæ. Форумы программæйы ма ис конкурс «PRO Кавказ». Журналисттæ йæм сæ куыстытæ бацæттæ кодтой 9 социалон-экономикон къабазы æмæ сæрмагонд номинацийы – «Кавказ. Ломая стереотипы».
